جەتىسۋ وبلىسىندا ناۋرىز مەيرامىنىڭ ونكۇندىگى اياسىنداعى مادەنيەت جانە ۇلتتىق سالت-داستۇرلەر كۇنىنە وراي «ومىرگە العاشقى قادام» اتتى تۇساۋكەسەر ءراسىمى وتكىزىلىپ، ءبىر مەزگىلدە 336 بالانىڭ تۇساۋى كەسىلدى. بۇل ءراسىم قازاقستاننىڭ رەكوردتار كىتابىنا ەنگىزىلدى، دەپ حابارلايدى Dalanews.kz
تالدىقورعان قالاسىنداعى شارا «جاستار» سپورت سارايىندا وبلىس اكىمى بەيبىت يسابايەۆتىڭ قاتىسۋىمەن ءوتتى. مەرەكەلىك ءراسىم قىدىر اتا كەيپىندەگى قاريانىڭ كوپكە باتا بەرۋىمەن باستالدى.
وبلىستىڭ اۋدان-قالالارى سپورت سارايىنداعى شاراعا بەينەبايلانىس ارقىلى قوسىلدى. وسى كۇنى كەربۇلاق، كوكسۋ، ەسكەلدى، الاكول، سارقان اۋداندارىندا 30 بالادان، اقسۋ اۋدانى مەن تەكەلى قالاسىندا 20 بالادان، قاراتال اۋدانىندا 50 بالا، سونداي–اق تالدىقورعان قالاسىندا، جالپى سانى 336 بالانىڭ ءبىر مەزگىلدە تۇساۋى كەسىلدى. تۇساۋكەسەر ءراسىمىن بالالاردىڭ جولى اشىق، قادامى نىق، ءومىرى ۇزاق بولسىن دەگەن نيەتپەن كوپكە سىيلى ارداگەرلەر، ونەر قايراتكەرلەرى، قالامگەرلەر، جۋرناليستەر، دارىگەرلەر، مەملەكەتتىك قىزمەتشىلەر، كاسىپكەرلەر، قوعامدىق بىرلەستىك وكىلدەرى ت.ب. اتقاردى.
شارادا رەكوردتاردى تىركەۋ كوميسسياسىنىڭ مۇشەسى باقىتجان تاستۇلەكوۆ ءسوز سويلەدى.
"ەلىمىزدە ءۇش جۇزدەن استام بالانىڭ تۇساۋىن ءبىر مەزگىلدە كەسۋ العاش رەت جەتىسۋ وبلىسىندا وتكىزىلىپ وتىر. سوندىقتان بۇل فاكت قازاقستاننىڭ رەكوردتار كىتابىنا ەنگىزىلدى"، - دەدى ول جانە ونى راستايتىن سەرتيفيكات ۇسىندى.
كوپ بالالى انا، ۇشەمدەردى ومىرگە اكەلگەن سەنباي تۇرسىنبەك تە وسى مەرەكەدە سابيلەرىنىڭ تۇساۋىن كەسكىزۋگە ارنايى الىپ كەلدى. العاشقى قادامىن جاساعان بۇلدىرشىندەردىڭ تۇساۋىن ءبىلىم بەرۋ سالاسىنىڭ ۇزدىگى، 40 جىلعا جۋىق تاجىريبەسى بار ينجەنەر-پەداگوگ اسەت ءجۇمادىلوۆ كەستى.
"وتباسىندا التى بالامىز بار، تۇڭعىشىمىز دارىن 13 جاستا، ول دا بۇگىن مەنىمەن بىرگە كەلدى. كۇيەۋىم اسپاز بولىپ جۇمىس ىستەيدى. بۇگىن وسى مەرەكە كۇنى ءۇش كىشكەنتايىم - دارحان، ديانا، داريانىڭ تۇساۋىن كەسكىزدىم. بۇل ءراسىمنىڭ ءدال ناۋرىز كۇندەرىندە اتقارىلعانىن جاقسىعا بالاپ وتىرمىن. بالالارىمنىڭ الداعى بولاشاق جولى ءۇشىن جاقسى ءبىر بەلگى دەپ سانايمىن"، - دەدى ول.
وسى كۇنى ناۋرىزبايەۆتار وتباسى دا قۋانىشقا كەنەلىپ، 22 ناۋرىزدا ءبىر جاسقا تولاتىن كىشكەنتاي يناياتتىڭ تۇساۋى كەسىلدى:
"تۇڭعىش بالامىزدىڭ وسىنداي مەرەكەلىك، سالتاناتتى جاعدايدا العاشقى قادامىن جاساعانىنا قاتتى قۋانىپ تۇرمىز. جاستاردىڭ ۇلتتىق داستۇرلەرىمىزدى ساقتاپ، ونى ۇستانۋعا بەلسەندى قاتىسقانىن قوشتايمىن"، - دەيدى يناياتتىڭ اناسى ديانا الىمبەك.
س. لۋگانسكيي اتىنداعى تالدىقورعان اۆيابازاسىنىڭ كومانديرى، 10 جىلدان استام ۇشقىش قىزمەتىن اتقارىپ كەلە جاتقان كاپيتان ايدوس دوسمۇحامبەتوۆتىڭ وتباسى دا قۇتتىقتاۋ تىلەكتەرىن جەتكىزدى.
"ۇيلەنگەنىمىزگە 6 جىل بولدى، ەكى بالامىز بار. بۇگىن 11 ايلىق قىزىمىز ءالسافيدىڭ تۇساۋىن كەستىك. بۇگىنگى شاراعا قاتىسقان بالالاردىڭ بارىنە قۇتتى قادام تىلەيمىز، جولدارى اشىق بولسىن. ناۋرىز مەرەكەسىمەن بارشا حالىقتى قۇتتىقتايمىز"، - دەدى ونىڭ جۇبايى ارمانگۇل تولەگەن.
تاعى ءبىر قۋانىش يەسى - اسەل مىرزاحان قىزى ءوزىنىڭ جىلى لەبىزىن جەتكىزدى.
"ءۇش بالانىڭ اناسىمىن. ۇلىم بەيبارىس، قىزىم ايكۇنىم جانە كىشى ۇلىم قۇنانباي ءبارىمىز مۇندا بىرگە كەلدىك. بۇگىن كىشى بالامنىڭ تۇساۋى كەسىلدى. ءبىز وتباسىندا ءداستۇر-سالتىمىزدى قۇرمەت تۇتامىز، اتا-بابالارىمىزدىڭ ۇستانعان ءتالىمدى جولىن جالعاستىرۋعا، تاريحتى بىلۋگە، مادەني مۇرالارىمىزدى ساقتاۋعا ەرەكشە كوڭىل بولەمىز. بۇگىنگى شارا دا - سونداي قۇرمەتتىڭ ءبىرى"، - دەدى «تاتەك» اق ينجەنەرى اسەل مىرزاحان قىزى.
ال بۇل كۇنى قاراتال اۋدانىندا تۇساۋى كەسىلگەن 30 بالاعا بايعازى رەتىندە قوزى سىيعا بەرىلدى.
"ءبىزدىڭ وتباسىمىز ءۇشىن بۇگىن قۋانىش، قىزىمىز العاشقى قادامىن جاسادى. ناۋرىز مەيرامىمەن، قاسيەتتى رامازان ايىمەن تۇسپا-تۇس كەلگەن جاقسىلىققا اۋلەتىمىز ەرەكشە قۋانىپ وتىر. ۇيىمداستىرۋشىلارعا ۇلكەن راحمەت. بۇگىن قىزىما سىيعا تارتىلعان كىشكەنتاي قوزىسى ەندى وزىمەن بىرگە شاپقىلاپ ويناپ وسەتىن بولدى"، - دەدى كوپبالالى انا، «التىن القا» يەگەرى ليدا جانبوتا.
