Astanada Joǵary aýditorlyq palata ǵimaratyn salý úshin 26 turǵyn úi súriledi, dep habarlaidy Dala News.
Qalalyq Turǵyn úi jáne turǵyn úi inspektsiiasy basqarmasynyń málimetinshe, tiisti sheshim 2024 jylǵy 23 mamyrdaǵy ákimdik qaýlysy negizinde qabyldanǵan.
Joba Kerei, Jánibek handar jáne Oral kósheleriniń qiylysynda júzege asyrylady.
Qazirgi tańda:
•26 úidiń 14-i satyp alynǵan;
•12 úi boiynsha ótemaqy máselesi sotta qaralyp jatyr.
Mekemeniń málimetinshe, múliktiń quny táýelsiz baǵalaý uiymdary arqyly naryqtyq baǵamen anyqtalady.
Eger menshik ieleri usynylǵan ótemaqymen kelispese, jer telimderin májbúrli túrde alý sot arqyly júzege asyrylady.
Bul jaǵdaida sot arnaiy saraptama taǵaiyndap, sonyń qorytyndysy boiynsha ótemaqy kólemin belgileidi.
Qorytyndy tólem mólsheri sot sheshimimen bekitiledi.
