15 qarashada Atyraý qalasynyń №2 soty Atyraý oblysy ákiminiń burynǵy orynbasary Baqytgúl Hamenovany 7 jylǵa bostandyǵynan aiyrý, alaida kámeletke tolmaǵan balalary baryn eskere otyryp, jazany úsh jyldan keiin óteý jóninde úkim shyǵardy.
Sot úkiminde Baqytgúl Hamenovanyń múlki tárkilenetini, "Qurmet" ordeni men memlekettik laýazymdy atqarý quqyǵynan ómir boiyna aiyrylǵany kórsetilgen.
Sot zalynan ýaqytsha bostandyqqa shyqqan soń Baqytgúl Hamenova "sot úkimimen kelispeitinin, apelliatsiialyq shaǵym túsiretinin" málimdedi.
Baqytgúl Hamenova isimen birge qaralyp jatqan Atyraý oblystyq mádeniet basqarmasynyń burynǵy jetekshisi Aqylbek Rysqalievti sýdia Jumaǵali Táshimov 7 jylǵa, "Balqytý" JShS direktory Ómirtai Adamovty 4 jylǵa bostandyǵynan aiyrdy.
31 qazanda Atyraý oblysy ákiminiń burynǵy orynbasary Baqytgúl Hamenovanyń isi boiynsha ótken kezekti sot otyrysyndaǵy jaryssózden keiin prokýror Laýra Asanova Hamenovany jeti jylǵa bostandyǵynan aiyrýdy, múlkin tárkilep, memlekettik qyzmet atqarýǵa ómir boiyna tyiym salýdy, kámeletke tolmaǵan jas balalary bar ekenin eskerip, jazasyn úsh jyldan keiin óteýge mindetteýdi suraǵan.
Prokýror Atyraý oblystyq tilderdi damytý jáne arhiv basqarmasynyń burynǵy jetekshisi Aqylbek Rysqalievti de 7 jylǵa bostandyǵynan aiyrýdy, "Balqytý" kompaniiasynyń direktory Ómirtai Adamovty 4 jylǵa bostandyǵynan aiyrýdy suraǵan.
13 qazandaǵy sot otyrysynda Aqylbek Rysqaliev "para alýshy jáne para berýshi arasyndaǵy deldal bolǵany týraly" burynǵy sózinen ainyp, Hamenovanyń "4,5 million teńgege qatysy joǵyn" málimdegen. Ol burynǵy sózin "sybailas jemqorlyqqa qarsy is-qimyl agenttigi qyzmetkerleriniń qysymymen aittym" degen.
Atyraý oblysy ákiminyń burynǵy orynbasary Baqytgúl Hamenova men oblystyq mádeniet basqarmasynyń burynǵy jetekshisi Aqylbek Rysqaliev Atyraýǵa "Abai eskertkishin ornatýǵa arnalǵan memlekettik satyp alý kelisimin jasasqanda 4,5 million teńge para alǵan" degen kúdikke ilingen edi.
Baqytgúl Hamenova isi biyl mamyrda sotqa túsken. Onyń ustalǵany týraly aqparat 2021 jyldyń jeltoqsanynda shyqqan edi. Bastapqyda úiqamaqqa alynyp, keiin tergeý izoliatoryna aýystyrylǵan.
Baqytgúl Hamenova 2020 jyldyń naýryz aiynda Atyraý oblysy ákiminiń orynbasary qyzmetine taǵaiyndalǵan. Oǵan deiin altynshy shaqyrylymdaǵy parlament májilisiniń depýtaty (2016 jyldyń naýryzy - 2020 jyldyń naýryzy) bolǵan.
Onyń 2016 jyly "Nur Otan" partiiasynyń (qazirgi - "Amanat) sezinde Qazaqstannyń sol kezdegi prezidenti Nursultan Nazarbaevqa arnalǵan madaq sózi qoǵamda kóp talqylanǵan edi.
