Konstitýtsiialyq Sot tóraǵasynyń orynbasary Baqyt Nurmuhanov jańa Konstitýtsiia jobasyn jetildirý barysy men jalpyhalyqtyq talqylaý nátijesinde engizilgen negizgi ózgerister týraly aityp berdi, dep habarlaidy Dalanews.kz
Onyń aitýynsha, jańa Konstitýtsiia jobasy jariialanǵan sátten bastap ártúrli arnalar arqyly 4 myńnan astam usynys kelip túsken. Baqyt Nurmuhanov atap ótkendei, Konstitýtsiialyq komissiia barlyq usynystar, pikirler men eskertýlerdi muqiiat zerdelep jatyr.
«Taldaý kórsetkendei, olardyń birqatary nazar aýdarýǵa turarlyq jáne baptardyń mazmunyn tolyqtyrady, kepildikterdi kúsheitedi, quqyqtyq normalardyń tujyrymdamasyn jaqsartady, sondai-aq aiqyndyq pen quqyqtyq naqtylyqty arttyrady», – dedi Baqyt Nurmuhanov Konstitýtsiialyq komissiianyń kezekti otyrysynda.
Dálirek aitqanda, teńgeni ulttyq valiýta retinde konstitýtsiialyq turǵyda bekitý usynysyn júzege asyrý úshin 2-bap jańa tarmaqpen tolyqtyryldy. Qazaqstan Respýblikasynyń ulttyq valiýtasy (aqsha birligi) – teńge. Teńgeni emissiialaýdyń airyqsha quqyǵy Qazaqstan Respýblikasyna tiesili. Spikerdiń aitýynsha, azamattardyń ótinishterinde de osyndai usynystar bolǵan.
Bul baptyń 6-tarmaǵy 7-tarmaq bolyp ózgertilip, joba redaktsiiasynda mynadai mazmunda saqtalady: «Qazaqstan Respýblikasynyń Egemendigi, Táýelsizdigi, ýnitarlyǵy, aýmaqtyq tutastyǵy men basqarý úlgisi ózgermeidi».
«6-bapta memlekettik organda saiasi partiia uiymyn qurýǵa jol berilmeitini týraly normany 1-tarmaqtan 2-tarmaqqa ózgerissiz aýystyrý usynylyp otyr. Bul norma atalǵan baptyń 2-tarmaǵynyń erejelerin logikalyq turǵydan tolyqtyrady, onda memlekettiń qoǵamdyq birlestik isine, al qoǵamdyq birlestiktiń memleket isine zańsyz aralasýyna jáne qoǵamdyq birlestikke memlekettik organ fýnktsiialaryn júkteýge jol berilmeitini jazylǵan», - dep habarlady Baqyt Nurmuhanov.
Konstitýtsiia jobasynyń azamattyq máselelerine arnalǵan 12-baby da naqtylaýdy qajet etedi degen usynystar aitylýda. Atap aitqanda, 3-tarmaqqa Qazaqstan Respýblikasynyń azamaty qos azamattyqqa nemese kóp azamattyqqa ie bola almaityny, al ózge azamattyqtyń bolýy zańda kórsetilgen tártip pen sharttarǵa sáikes, Qazaqstan Respýblikasynyń azamattyǵyn toqtatýǵa negiz bolatyny týraly norma engiziledi.
Engizilgen usynystar ishinde Konstitýtsiiada árbir adamnyń memlekettik bilik organdary men olardyń qyzmetshileriniń zańsyz áreketteri saldarynan kelgen zalaldyń ótemin alýǵa quqyǵyn bekitý de erekshe qyzyǵýshylyq týdyrǵan.
«Qylmystyq-protsestik kodekste qylmystyq protsesti júrgizetin organnyń zańsyz áreketterinen keltirilgen zalaldy óteý tártibin retteitin 4-taraý qarastyrylǵan. Ondaǵy erejelerge sáikes, zańsyz ustaý, qamaýda ustaý, úiqamaqqa alý, qyzmetinen ýaqytsha shettetý, arnaýly meditsinalyq uiymǵa ornalastyrý, sottaý, meditsinalyq sipattaǵy májbúrleý sharalaryn qoldaný saldarynan keltirilgen zalal qylmystyq protsesti júrgizetin organnyń kinásine qaramastan tolyq kólemde biýdjet qarajaty esebinen óteledi», – dep atap ótti spiker.
Sonymen birge, ol Konstitýtsiia jobasynyń 18-baby naqtylanǵanyn aitty. Jańa redaktsiiaǵa sáikes, sot sheshiminsiz adamdy zańda kózdelgen merzimderden artyq ustaýǵa bolmaidy. Sóz sońynda Baqyt Nurmuhanov jańa Konstitýtsiia jobasyn jetildirý jumystary jalǵasyp jatqanyn jetkizdi.
