Túrkistan oblysynda jedel meditsinalyq járdem qyzmetiniń sapasyn arttyrý maqsatynda 60 jańa sanitarlyq avtokólik alynyp, meditsinalyq mekemelerge tabystaldy. Jańa kólikterdiń jalpy quny – 4,2 mlrd teńgeden asady.
Zamanaýi jabdyqtarmen tolyq jabdyqtalǵan jedel járdem kólikteri oblystyń barlyq aýdandary men qalalaryna taratylyp, jedel járdem qyzmetiniń tiimdiligin arttyrýǵa múmkindik beredi. Jańa tehnikanyń meditsinalyq qural-jabdyqtary eresekterge de, 1 jastan asqan balalarǵa da arnalǵan. Avtokólikter portativti ókpeni jasandy jeldetý apparatymen, defibrilliatormen, júrek-ókpe reanimatsiiasyna arnalǵan jiyntyqpen, elektrokardiografpen jabdyqtalǵan.
Túrkistan oblysynyń ákimi Nuralhan Kósherov jedel járdem kólikterin tapsyrý rásiminde bul bastamanyń memleket basshysy Qasym-Jomart Toqaevtyń «Árbir azamattyń ómiri men densaýlyǵy – memleket úshin eń qymbat qundylyq» degen qaǵidatyna negizdelgenin atap ótti.
– Halyqtyń densaýlyǵy – memlekettiń basty bailyǵy. Densaýlyq saqtaý salasyn damytý – bizdiń basty mindetimiz. Búgin tabystalyp otyrǵan kólikter dárigerlerimizdiń kúndelikti eńbegin jeńildetip qana qoimai, turǵyndarǵa kórsetiletin meditsinalyq kómektiń sapasyn edáýir jaqsartady. Bul – halyqqa jaqyn bolýdyń naqty úlgisi. Bul kólikter zamanaýi meditsinalyq qural-jabdyqtarmen qamtylǵan. Adal eńbekpen halyq aldyndaǵy abyroilaryńyz arta bersin, – dedi oblys ákimi.
Sońǵy jyldary Túrkistan oblysynda meditsinalyq infraqurylymdy jańǵyrtý boiynsha aýqymdy jobalar qolǵa alynǵan. Atap aitqanda, Túrkistan qalasynda 570 tósek-oryndyq kópbeiindi aýrýhananyń qurylysy aiaqtalýǵa jaqyn. Bul nysan iske qosylǵanda 1200-den astam meditsina qyzmetkeri jumysqa tartylady.
Birikken Arab Ámirlikteriniń Abý-Dabi qorymen áriptestik aiasynda 80 tósek-oryndyq perzenthana salynýda. 60 oryndyq ońaltý ortalyǵynyń qurylysy aiaqtalyp, jaqyn arada paidalanýǵa beriledi. Saryaǵashta 300 oryndyq kópbeiindi keshen, Ordabasyda 200 oryndyq perinataldyq ortalyq salý jobasy ázirlendi. Ordabasy, Jetisai, Saryaǵash aýdandaryndaǵy ortalyq aýrýhanalar 4,1 mlrd teńgege jóndeldi. Sairam aýdandyq aýrýhanasynda 3,1 mlrd teńgege kúrdeli jóndeý bastaldy. Endi aýdanaralyq aýrýhanalar MRT, KT, angiograf syndy aýyr meditsinalyq tehnikamen qamtylady.
Halyq sany men qajettiliktiń ósýine bailanysty, jedel járdem qyzmetine degen suranys jyl sanap artyp keledi. Eger 2023 jyldyń 8 aiynda jedel járdemge 512 myń shaqyrtý tirkelse, 2024 jyldyń 8 aiynda bul kórsetkish 635 myńǵa jetken. Iaǵni, 123 myń shaqyrtýǵa artqan. Osyny eskergen óńir basshylyǵy 2023 jyly da 88 sanitarlyq avtokólik satyp alǵan bolatyn. Buǵan qosa, 2 reanimobil nárestelerge arnalǵan arnaiy kólik retinde satyp alyndy.
Jańa kólikterdiń artýy shuǵyl meditsinalyq kómekti kórsetý ýaqytyn qysqartady. Ásirese shalǵai aýyldar men jedel meditsinalyq qoldaý qajet aýdandar úshin bul – naqty kómek.
