تٷركٸستان وبلىسىندا جەدەل مەديتسينالىق جەردەم قىزمەتٸنٸڭ ساپاسىن ارتتىرۋ ماقساتىندا 60 جاڭا سانيتارلىق اۆتوكٶلٸك الىنىپ, مەديتسينالىق مەكەمەلەرگە تابىستالدى. جاڭا كٶلٸكتەردٸڭ جالپى قۇنى – 4,2 ملرد تەڭگەدەن اسادى.
زاماناۋي جابدىقتارمەن تولىق جابدىقتالعان جەدەل جەردەم كٶلٸكتەرٸ وبلىستىڭ بارلىق اۋداندارى مەن قالالارىنا تاراتىلىپ, جەدەل جەردەم قىزمەتٸنٸڭ تيٸمدٸلٸگٸن ارتتىرۋعا مٷمكٸندٸك بەرەدٸ. جاڭا تەحنيكانىڭ مەديتسينالىق قۇرال-جابدىقتارى ەرەسەكتەرگە دە, 1 جاستان اسقان بالالارعا دا ارنالعان. اۆتوكٶلٸكتەر پورتاتيۆتٸ ٶكپەنٸ جاساندى جەلدەتۋ اپپاراتىمەن, دەفيبريللياتورمەن, جٷرەك-ٶكپە رەانيماتسيياسىنا ارنالعان جيىنتىقپەن, ەلەكتروكارديوگرافپەن جابدىقتالعان.
تٷركٸستان وبلىسىنىڭ ەكٸمٸ نۇرالحان كٶشەروۆ جەدەل جەردەم كٶلٸكتەرٸن تاپسىرۋ رەسٸمٸندە بۇل باستامانىڭ مەملەكەت باسشىسى قاسىم-جومارت توقاەۆتىڭ «ەربٸر ازاماتتىڭ ٶمٸرٸ مەن دەنساۋلىعى – مەملەكەت ٷشٸن ەڭ قىمبات قۇندىلىق» دەگەن قاعيداتىنا نەگٸزدەلگەنٸن اتاپ ٶتتٸ.
– حالىقتىڭ دەنساۋلىعى – مەملەكەتتٸڭ باستى بايلىعى. دەنساۋلىق ساقتاۋ سالاسىن دامىتۋ – بٸزدٸڭ باستى مٸندەتٸمٸز. بٷگٸن تابىستالىپ وتىرعان كٶلٸكتەر دەرٸگەرلەرٸمٸزدٸڭ كٷندەلٸكتٸ ەڭبەگٸن جەڭٸلدەتٸپ قانا قويماي, تۇرعىندارعا كٶرسەتٸلەتٸن مەديتسينالىق كٶمەكتٸڭ ساپاسىن ەدەۋٸر جاقسارتادى. بۇل – حالىققا جاقىن بولۋدىڭ ناقتى ٷلگٸسٸ. بۇل كٶلٸكتەر زاماناۋي مەديتسينالىق قۇرال-جابدىقتارمەن قامتىلعان. ادال ەڭبەكپەن حالىق الدىنداعى ابىرويلارىڭىز ارتا بەرسٸن, – دەدٸ وبلىس ەكٸمٸ.
سوڭعى جىلدارى تٷركٸستان وبلىسىندا مەديتسينالىق ينفراقۇرىلىمدى جاڭعىرتۋ بويىنشا اۋقىمدى جوبالار قولعا الىنعان. اتاپ ايتقاندا, تٷركٸستان قالاسىندا 570 تٶسەك-ورىندىق كٶپبەيٸندٸ اۋرۋحانانىڭ قۇرىلىسى اياقتالۋعا جاقىن. بۇل نىسان ٸسكە قوسىلعاندا 1200-دەن استام مەديتسينا قىزمەتكەرٸ جۇمىسقا تارتىلادى.
بٸرٸككەن اراب ەمٸرلٸكتەرٸنٸڭ ابۋ-دابي قورىمەن ەرٸپتەستٸك اياسىندا 80 تٶسەك-ورىندىق پەرزەنتحانا سالىنۋدا. 60 ورىندىق وڭالتۋ ورتالىعىنىڭ قۇرىلىسى اياقتالىپ, جاقىن ارادا پايدالانۋعا بەرٸلەدٸ. سارىاعاشتا 300 ورىندىق كٶپبەيٸندٸ كەشەن, ورداباسىدا 200 ورىندىق پەريناتالدىق ورتالىق سالۋ جوباسى ەزٸرلەندٸ. ورداباسى, جەتٸساي, سارىاعاش اۋداندارىنداعى ورتالىق اۋرۋحانالار 4,1 ملرد تەڭگەگە جٶندەلدٸ. سايرام اۋداندىق اۋرۋحاناسىندا 3,1 ملرد تەڭگەگە كٷردەلٸ جٶندەۋ باستالدى. ەندٸ اۋدانارالىق اۋرۋحانالار مرت, كت, انگيوگراف سىندى اۋىر مەديتسينالىق تەحنيكامەن قامتىلادى.
حالىق سانى مەن قاجەتتٸلٸكتٸڭ ٶسۋٸنە بايلانىستى, جەدەل جەردەم قىزمەتٸنە دەگەن سۇرانىس جىل ساناپ ارتىپ كەلەدٸ. ەگەر 2023 جىلدىڭ 8 ايىندا جەدەل جەردەمگە 512 مىڭ شاقىرتۋ تٸركەلسە, 2024 جىلدىڭ 8 ايىندا بۇل كٶرسەتكٸش 635 مىڭعا جەتكەن. ياعني, 123 مىڭ شاقىرتۋعا ارتقان. وسىنى ەسكەرگەن ٶڭٸر باسشىلىعى 2023 جىلى دا 88 سانيتارلىق اۆتوكٶلٸك ساتىپ العان بولاتىن. بۇعان قوسا, 2 رەانيموبيل نەرەستەلەرگە ارنالعان ارنايى كٶلٸك رەتٸندە ساتىپ الىندى.
جاڭا كٶلٸكتەردٸڭ ارتۋى شۇعىل مەديتسينالىق كٶمەكتٸ كٶرسەتۋ ۋاقىتىن قىسقارتادى. ەسٸرەسە شالعاي اۋىلدار مەن جەدەل مەديتسينالىق قولداۋ قاجەت اۋداندار ٷشٸن بۇل – ناقتى كٶمەك.
