Memleket basshysy Qasym-Jomart Toqaev «Ekonomikany yryqtandyrý jónindegi sharalar týraly» jarlyqqa qol qoidy. Bul qujattyń maqsaty — kásipkerlerdiń jaǵdaiyn jaqsartyp, ekonomikaǵa memlekettiń qatysyn azaitý. Sonymen birge bizneske ketetin shyǵyndardy azaitý arqyly kásipkerlerge erkindikti qamtamasyz etýdi kózdeidi. Bul týraly prezidenttiń baspasóz qyzmeti habarlady.
Qandai sharalar josparlanyp otyrǵanyn sholyp óteiik:
- QR Básekelestikti qorǵaý jáne damytý agenttiginiń janynan jekeshelendirilýi kerek memlekettik aktivter kriteriilerin ázirlep, olardyń tizimin jasaityn Jekeshelendirý jónindegi ulttyq ofis qurylady;
- «Samuryq-Qazyna» UÁQ» AQ men onyń enshiles kompaniialary óz aldyna derbes ári sapaly jumys isteýine jaǵdai jasaityn sharalar bar;
- Taýar naryǵynda básekeni arttyratyn sharalar qarastyrylady;
- Biznes bastap, júrgizýge arnalǵan retteý saiasaty odan ári jetildiriledi;
- Jarlyqta biznestiń quqyqtary men zańdy múddelerin qorǵaýdy kúsheitýge, sonyń ishinde ekonomikalyq qyzmet salasyndaǵy qylmystyq quqyq buzýshylyqtardy qylmys sanatynan alyp tastaý, memlekettik organdar bastamashylyq etetin tyiym salý-shekteý sharalaryn prokýrorlarmen kelisý jáne basqa da rásimder arqyly kúsheitýge baǵyttalǵan is-sharalar kesheni jeke blok retinde berilgen.
«Jarlyqtyń júzege asyrylýy ekonomikadaǵy memlekettik sektordyń úlesin aýqymdy jáne jedel túrde qysqartýǵa, sondai-aq jeke kásipkerlik úshin ekonomikalyq keńistikti ulǵaitýǵa qosymsha serpin beredi», — dep jazady prezidenttiń baspasóz qyzmeti.
Sonymen qandai tapsyrma berildi?
- 2025 jylǵy 31 jeltoqsanǵa deiin kómirsýtek salasynda qyzmet kórsetetin ulttyq kompaniialar úsh jyl ishinde tikelei kelissózder arqyly jer qoinaýyn paidalaný quqyǵyn alýǵa basym quqyq ótkizbegen jer qoinaýy ýchaskelerin elektron aýktsion arqyly ótkizýge tiis. Iaǵni úsh jyl ishinde QazMunaiGaz ben QazaqGaz ulttyq kompaniialary rezervtelgen munai-gaz ýchaskeleri boiynsha jer qoinaýyn paidalanýǵa kelisimshartqa qol qoimasa, onda bul ýchaskeler onlain-aýktsiondarǵa shyǵarylady degen sóz.
- 2029 jylǵy 31 jeltoqsanǵa deiin ekonomika salalary arasynda jáne ishinde (elektrmen jabdyqtaý, sýmen jabdyqtaý jáne sý burý qyzmetteri) tarifterdi kross-sýbsidiialaý birtindep alyp tastalady.
- 2024 jylǵy 31 jeltoqsandaǵy deiin azamattarǵa ótemaqy tóleý sharasynyń tiimdi tetigin iske qosylyp, dijital tehnologiialar kómegimen kommýnaldyq qyzmetterdi tóleý boiynsha Memlekettik ataýly áleýmettik kómek pen turǵyn úi tólemin usyný máseleleri pysyqtalady.
