مەملەكەت باسشىسى قاسىم-جومارت توقايەۆ «ەكونوميكانى ىرىقتاندىرۋ جونىندەگى شارالار تۋرالى» جارلىققا قول قويدى. بۇل قۇجاتتىڭ ماقساتى — كاسىپكەرلەردىڭ جاعدايىن جاقسارتىپ، ەكونوميكاعا مەملەكەتتىڭ قاتىسىن ازايتۋ. سونىمەن بىرگە بيزنەسكە كەتەتىن شىعىنداردى ازايتۋ ارقىلى كاسىپكەرلەرگە ەركىندىكتى قامتاماسىز ەتۋدى كوزدەيدى. بۇل تۋرالى پرەزيدەنتتىڭ باسپا ءسوز قىزمەتى حابارلادى.
قانداي شارالار جوسپارلانىپ وتىرعانىن شولىپ وتەيىك:
- ق ر باسەكەلەستىكتى قورعاۋ جانە دامىتۋ اگەنتتىگىنىڭ جانىنان جەكەشەلەندىرىلۋى كەرەك مەملەكەتتىك اكتيۆتەر كريتەرييلەرىن ازىرلەپ، ولاردىڭ ءتىزىمىن جاسايتىن جەكەشەلەندىرۋ جونىندەگى ۇلتتىق وفيس قۇرىلادى؛
- «سامۇرىق-قازىنا» ءۇاق» اق مەن ونىڭ ەنشىلەس كومپانيالارى ءوز الدىنا دەربەس ءارى ساپالى جۇمىس ىستەۋىنە جاعداي جاسايتىن شارالار بار؛
- تاۋار نارىعىندا باسەكەنى ارتتىراتىن شارالار قاراستىرىلادى؛
- بيزنەس باستاپ، جۇرگىزۋگە ارنالعان رەتتەۋ ساياساتى ودان ءارى جەتىلدىرىلەدى؛
- جارلىقتا بيزنەستىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە، سونىڭ ىشىندە ەكونوميكالىق قىزمەت سالاسىنداعى قىلمىستىق قۇقىق بۇزۋشىلىقتاردى قىلمىس ساناتىنان الىپ تاستاۋ، مەملەكەتتىك ورگاندار باستاماشىلىق ەتەتىن تىيىم سالۋ-شەكتەۋ شارالارىن پروكۋرورلارمەن كەلىسۋ جانە باسقا دا راسىمدەر ارقىلى كۇشەيتۋگە باعىتتالعان ءىس-شارالار كەشەنى جەكە بلوك رەتىندە بەرىلگەن.
«جارلىقتىڭ جۇزەگە اسىرىلۋى ەكونوميكاداعى مەملەكەتتىك سەكتوردىڭ ۇلەسىن اۋقىمدى جانە جەدەل تۇردە قىسقارتۋعا، سونداي-اق جەكە كاسىپكەرلىك ءۇشىن ەكونوميكالىق كەڭىستىكتى ۇلعايتۋعا قوسىمشا سەرپىن بەرەدى»، — دەپ جازادى پرەزيدەنتتىڭ باسپا ءسوز قىزمەتى.
سونىمەن قانداي تاپسىرما بەرىلدى؟
- 2025 جىلعى 31 جەلتوقسانعا دەيىن كومىرسۋتەك سالاسىندا قىزمەت كورسەتەتىن ۇلتتىق كومپانيالار ءۇش جىل ىشىندە تىكەلەي كەلىسسوزدەر ارقىلى جەر قويناۋىن پايدالانۋ قۇقىعىن الۋعا باسىم قۇقىق وتكىزبەگەن جەر قويناۋى ۋچاسكەلەرىن ەلەكترون اۋكسيون ارقىلى وتكىزۋگە ءتيىس. ياعني ءۇش جىل ىشىندە قازمۇنايگاز بەن QazaqGaz ۇلتتىق كومپانيالارى رەزەرۆتەلگەن مۇناي-گاز ۋچاسكەلەرى بويىنشا جەر قويناۋىن پايدالانۋعا كەلىسىمشارتقا قول قويماسا، وندا بۇل ۋچاسكەلەر ونلاين-اۋكسيوندارعا شىعارىلادى دەگەن ءسوز.
- 2029 جىلعى 31 جەلتوقسانعا دەيىن ەكونوميكا سالالارى اراسىندا جانە ىشىندە (ەلەكترمەن جابدىقتاۋ، سۋمەن جابدىقتاۋ جانە سۋ بۇرۋ قىزمەتتەرى) تاريفتەردى كروسس-سۋبسيديالاۋ بىرتىندەپ الىپ تاستالادى.
- 2024 جىلعى 31 جەلتوقسانداعى دەيىن ازاماتتارعا وتەماقى تولەۋ شاراسىنىڭ ءتيىمدى تەتىگىن ىسكە قوسىلىپ، ديجيتال تەحنولوگيالار كومەگىمەن كوممۋنالدىق قىزمەتتەردى تولەۋ بويىنشا مەملەكەتتىك اتاۋلى الەۋمەتتىك كومەك پەن تۇرعىن ءۇي تولەمىن ۇسىنۋ ماسەلەلەرى پىسىقتالادى.
