Qazaqstanda alaiaqtar "utys lotereialaryn" oinatý arqyly oryndyqtarǵa arnalǵan massaj jabyndylaryn naryqtaǵy baǵasynan 10 ese qymbatqa satýda. "Utys oinaýǵa" kelisken adamdardyń atyna týra sol arada nesie rásimdelip, al "tegin syilyqtar" millionǵa ainalyp shyǵa keletin bolǵan. Ásirese, osyndai aktsiia qurbany bolǵan qostanailyqtar Tutynýshylar quqyǵyn qorǵaý komitetine shaǵymdanǵan, dep habarlaidy Dalanews.kz.
Konvert sýyrýdy usynatyn "utys lotereiasyn" oinatýshylar kóshedegi adamdarǵa jaqyndaidy. Konvertti ashqanda olardyń biri shańsorǵysh, taǵy biri útik, sol sekildi mikrotolqyndy peshter jáne basqa da qundy syilyqtarǵa ie bolǵany belgili bolady. "Syilyqty" tabystaý úshin kóshedegi adamdar dámhanaǵa nemese meiramhanalarǵa shaqyrylady. Biraq, ol arada "utysqa ie bolǵandardy" naǵyz tuzaq kútip turady.
"Syilyqpen birge utys oinatýshylar massaj jabyndylaryn satyp alýdy usynady. Eger satyp alýshynyń qolynda aqshasy bolmasa, satýshylar banktik qosymshalar arqyly dál sol arada nesie rásimdeidi. Nátijesinde "tegin syilyq" tutynýshyǵa 1 million teńgeden astam shyǵyn ákeledi, al taýar naryqtyq qunynan 10 ese qymbatqa túsedi", – dep túsindiredi tutynýshylardyń quqyqtaryn qorǵaý komiteti.
Mundaida óz quqyqtaryńyzdy qalai qorǵaýǵa bolady?
Quzyrly vedomstvo mamandary bul rette mynalardy eske salady:
- Satyp alǵannan keiin 14 kún ishinde taýardy keri qaitarýǵa bolady;
- Satyp alý faktisi men qaitarý somasyn kórsete otyryp, sotqa deiingi talap qoiý aryzyn toltyrý qajet;
- Satýshy shaǵymdy 10 kún ishinde qaraýǵa mindetti;
- Eger satýshy kórsetilgen zańdy meken-jaiynda bolmasa, sotqa júginińiz;
- Sondai -aq, bankke josyqsyz satýshy týraly habarlaý usynylady, bul olardyń shottaryn buǵattaýǵa kómektesedi.
Mamandar "tegin syilyq" aktsiialary agressivti marketing pen psihologiialyq qysymdy jii paidalanatynyn eske salady. Sondyqtan el azamattaryna qyraǵy bolýǵa jáne satyp alý sharttaryn teksermei, eshbir qujatqa qol qoimaýǵa keńes beredi.
