Jambyl oblysynda "qaıtys boldy" dep tirkelgen 73 jastaǵy zeınetker áıel aman-esen tabyldy. Sot sheshimimen onyń ólimi týraly akt jazbasy joıylyp, berilgen kýálik jaramsyz dep tanyldy, dep habarlaıdy Dalanews.kz.

Belgili bolǵandaı, áıel 2024 jyldyń tamyzynda Tarazdaǵy ápkesiniń úıine ketken. Biraz ýaqyt habarsyz qalǵan soń týystary polısıaǵa onyń joǵalǵany týraly aryz túsirgen. Sol jyly aýyl mańyndaǵy óristen tabylǵan belgisiz adamnyń máıitin qyzy men nemeresi joǵalǵan áıel dep tanyp, ólimi resmı tirkelgen.

Alaıda 2025 jyldyń qyrkúıeginde zeınetker Jambyl aýdany Qostóbe aýylyndaǵy aǵasynyń úıine aman-esen oralǵan. Ol Qurban aıttan keıin Aısha bıbi aýylyna baryp, pıaz jınaý jumysyna ornalasqanyn aıtqan. Zeınetaqysy toqtap qalǵan soń Tarazǵa kelgende óziniń "qaıtys bolǵanyn" bilgen.

Sotta tabylǵan máıittiń basqa adamǵa tıesili ekeni anyqtalyp, qaıta saraptama júrgizildi. Nátıjesinde ólim týraly jazba kúshin joıyp, zeınetkerdiń quqyqtyq mártebesi tolyq qalpyna keltirildi.