Jambyl oblysynda turǵyn úi men áleýmettik jeńildikterdi "kezeksiz rásimdep beremiz" degen ýádemen jasalǵan kópepizodty alaiaqtyq is boiynsha sot úkimi shyqty. Is materialdaryna sáikes, birneshe jyl boiy azamattardy aldap kelgen Aida Janaeva men Aiman Asqar kináli dep tanyldy, dep habarlaidy Dalanews.kz.
Tergeý dereginshe, aiyptalýshylar 2019–2025 jyldar aralyǵynda Qordai aýdanynda jáne Almaty qalasynda azamattardyń senimine kirip, memleketten beriletin qaitarymsyz baspana, múgedektik rásimdeý, balabaqsha ashýǵa kómektesý sekildi ýádelermen iri kólemde qarjy jinaǵan. Alaida olardyń memlekettik organdarda eshqandai bailanysy bolmaǵany jáne ýáde etilgen qyzmetterdi oryndaýǵa múmkindigi joq ekeni anyqtalǵan. Jinalǵan qarajat jeke maqsattarǵa jumsalǵan.
Is boiynsha keminde 10 epizod tirkelip, jábirlenýshiler arasynda kópbalaly otbasylar, áleýmettik osal top ókilderi men múgedek balasy bar azamattar bar. Aldyn ala esep boiynsha keltirilgen materialdyq shyǵyn birneshe ondaǵan million teńgege jetken.
Sot úkimimen Aida Janaeva men Aiman Asqar QR Qylmystyq kodeksiniń 190-babynyń 3-bóligi boiynsha (aldyn ala sóz bailasý arqyly, iri mólsherde jasalǵan alaiaqtyq) kináli dep tanyldy. Aida Janaeva 4 jyl 6 aiǵa, Aiman Asqar 4 jylǵa bas bostandyǵynan aiyryldy. Alaida 2025 jylǵy raqymshylyq týraly zańǵa sáikes, jazalary qysqartylyp, tiisinshe 3 jyl jáne 2 jyl 8 ai bolyp belgilendi.
Sonymen qatar sot jábirlenýshilerdiń azamattyq talaptaryn qanaǵattandyryp, aiyptalýshylardan milliondaǵan teńge kólemindegi materialdyq zalaldy óndirýdi mindettedi. Úkim zańdy kúshine engennen keiin sottalǵandar probatsiialyq baqylaýǵa alynady.
