Áleýmettik jelide Jambyl oblysynda eki balanyń quldyqta júrgeni jaıly vıdeo tarady,- dep habarlaıdy Dalanews.kz

Kadrlarda balalardyń júdeý kúıi, denelerindegi kógergen jáne jaraqat izderi kórinedi.

Vıdeodaǵy balalardyń aıtýynsha, olar bes jyldan beri zorlyq-zombylyq kórip keledi. Olardyń telefondaryn tartyp alǵan jáne kúndiz-túni qoı baqqyzǵan.

“Qoı azaıyp qalsa bizden kóredi, sol úshin taıaq jeımiz. Denem jaraǵa toly. Týǵan ákemniń qolyna barǵym keledi”, – deıdi olardyń biri.

Sondaı-aq balalar ár ótken kólikten saǵat surap, ashtyq kórgenin, keıde qaıyr suraýǵa májbúr bolǵanyn aıtty.

“Anam sóılegisi keledi, biraq ózi qorqady. Bizge kómektesińizdershi, alyp ketińizdershi, ótinemin”, – dep jylady bala.

Aldyn ala málimet boıynsha, oqıǵa Talas aýdanyndaǵy Qarataý qalasynyń mańynda bolǵan.

Balalar quqyqtary jónindegi ýákil Dınara Zakıeva málimdeme jasap, olardyń turǵan jeri anyqtalǵanyn habarlady.

“Atalǵan fakti boıynsha qylmystyq is qozǵaldy. Aımaqtyq ýákil Daýren Baqjanov barlyq mán-jaıdy anyqtaý úshin balalarǵa bara jatyr”, – dedi ol.

Polısıanyń dereginshe, balalardyń jaǵdaıyna qatysty tergeý bastaldy. Oqıǵaǵa qatysy bar adamdardyń áreketine quqyqtyq baǵa beriletin bolady.