Jambyl oblysynda jastardyń kitapqa degen qyzyǵýshylyǵyn arttyryp, ıntellektýaldy áleýetin kóterýge baǵyttalǵan «Áýlıeata — kitap oqıtyn óńir» jobasy qarqyndy damyp keledi. Sonyń eń jarqyn bastamalarynyń biri – bıyl alǵash ret uıymdastyrylǵan «Oı sheberi» zıatkerlik oıyny. Shara Jambyl oblystyq «Móldir bulaq» oqý-saýyqtyrý ortalyǵynda ótti jáne myńdaǵan jasqa jańa múmkindik syılady, dep habarlaıdy Dalanews.kz

Bul joba óńirdiń mádenı-rýhanı ómirinde erekshe oryn alýda. Onyń basty maqsaty – ıntellektýaldy ortany qalyptastyrý, jastardyń kitapqa degen qyzyǵýshylyǵyn kúsheıtý, oı-órisin keńeıtý jáne shyǵarmashylyq áleýetin damytý. «Áýlıeata — kitap oqıtyn óńir» aıasynda osy ýaqytqa deıin «Oqýshylar lıgasy», «Daryndy mektepter lıgasy» jáne «Tehnıkalyq jáne kásiptik bilim berý uıymdary lıgasy» boıynsha 15 oıyn ótkizilip, 400 komanda, shamamen 2000 kitap qamtyldy. Bul kórsetkish jastardyń bilimge degen qushtarlyǵy artyp kele jatqanyn kórsetedi.

Zıatkerlik saıys erekshe formatymen de kózge tústi. Qatysýshylarǵa ártúrli taqyryptardy qamtıtyn suraqtar, logıkalyq tapsyrmalar jáne tanymdyq saýaldar usynyldy. Barlyq oıyndar ádil ári ashyq ótti. Jastar bilimin synap qana qoımaı, jańa tájirıbe jınaqtap, logıkalyq oılaý qabiletin damytty. Saıys barysynda dostyq pen seriktestik ahýaly erekshe sezildi. Bul oıyndar jastar arasyndaǵy mádenı jáne rýhanı baılanystardy nyǵaıtyp, olardy bir-birimen jaqyndata tústi.

«Oı sheberi» oıyny ýaqyt óte mazmunyn keńeıtip, jańa ádistemelik baǵyttarmen tolyqtyrylýda. Qarapaıym bilim jarysy ǵana emes, jas býynnyń kreatıvti oılaý qabiletin jetildiretin alańǵa aınaldy. Joba kitap oqý mádenıetin dáripteýde jáne bilimge qushtar jastardyń qataryn kóbeıtýge baǵyttalǵan.

Oıyndar úsh túrli lıga boıynsha uıymdastyryldy.

Oqýshylar lıgasy – jalpy orta bilim berý uıymdarynyń oqýshylary úshin ótkizildi. Jyl boıy ótken 11 oıynda júzdegen komanda baq synap, tek úzdikter ǵana grand fınalǵa joldama aldy. Bastapqyda 350-den astam komanda jarysqa qatysyp, fınalǵa eń myqty 11 top qana shyqty. Olar 2 mıllıon teńgelik júlde qoryna talasý úshin kúresti. Grand fınalǵa qatysýshylarǵa aldyn ala 20 túrli kitap usynylyp, solar boıynsha suraqtar daıyndaldy.

Fınalda baq synaǵan komandalar qatarynda:

• Merki aýdanynan – Sypataı Álibekuly atyndaǵy №19 orta mektebi;
• Turar Rysqulov aýdanynan – Qulan tirek mektep-gımnazıasy;
• Moıynqum aýdanynan – Shyǵanaq orta mektebi;
• Sarysý aýdanynan – Muhtar Áýezov atyndaǵy mektep-gımnazıasy;
• Jambyl aýdanynan – Muhtar Áýezov atyndaǵy orta mektebi;
• Talas aýdanynan – Ahmet Baıtursynuly atyndaǵy gımnazıa;
• Jýaly aýdanynan – Álıhan Bókeıhan atyndaǵy №15 tirek mektep-lıseıi;
• Baızaq aýdanynan – Nyǵmetýlla Kıikbaev atyndaǵy mektep-gımnazıasy;
• Shý aýdanynan – Abaı atyndaǵy orta mektebi;
• Taraz qalasynan – №15 mektep-gımnazıasy jáne №23 orta mektebi.

Aıta keterligi, fınalda eki Muhtar Áýezov atyndaǵy mektep jáne eki №15 mektep kezdesti – bul da bilim dodasyndaǵy qyzyqty sátterdiń biri boldy.

Daryndy mektepter lıgasy da erekshe tartysty ótti. Bul baǵytqa oblystyń mamandandyrylǵan mektepterinen 20 komanda ótinish berip, olardyń ishinen úzdik 11 top aqtyq synǵa jetti. Qatysýshylardyń árqaısysy 16 kitap oqyp daıyndaldy. Júlde qory – 1,2 mln teńge boldy. Úsh kezeńniń nátıjesi qosylyp, jeńimpazdar anyqtaldy:

• 3 oryn – Abaı atyndaǵy daryndy balalarǵa arnalǵan qazaq tili men ádebıetin tereńdete oqytatyn mektep-gımnazıasynyń «Tastúıin» toby (300 000 tg)
• 2 oryn – «Daryn» lıseı-ınternatynyń «Samuryq» toby (400 000 tg)
• 1 oryn – «Bilim-ınnovasıa» lıseı-ınternatynyń «Rýhanıat» toby (500 000 tg jáne «Oı sheberi» kýbogy).

Jeńimpazdardy Jambyl oblysy ákimdiginiń bilim basqarmasy janyndaǵy «Jambyl daryny» ortalyǵynyń dırektory Maıra Esenalıeva marapattady.

Tehnıkalyq jáne kásiptik bilim berý uıymdary lıgasy da bıyl jastardyń belsendi qatysýymen ótti. Bul lıgaǵa 25 komanda qatysyp, ishinen úzdik 13 top fınalǵa jetti. Júlde qory – 1,2 mln teńge. Qatysýshylar 15 kitap oqyp daıyndaldy. Qorytyndysynda:

• 3 oryn – Qordaı aýdanynyń «Bereke» kolejiniń toby (300 000 tg)
• 2 oryn – Jambyl medısınalyq joǵary koleji (400 000 tg)
• 1 oryn – Abaı atyndaǵy Jambyl gýmanıtarlyq joǵary koleji (500 000 tg jáne «Oı sheberi» kýbogy).

Fınaldyq básekeniń taǵy bir jańalyǵy – suraqtardy ázirleýde jasandy ıntellekt qoldanylýy. Bul oıynǵa jańa tehnologıalyq sıpat berip, qatysýshylarǵa jańa tájirıbe syılady. Sonymen birge sharaǵa «Jambyl damý» qory, «Jambyl Taraz» gazeti jáne «Áýlıeata TransPass» kompanıasy demeýshilik kórsetti.

Grand fınal qorytyndysy da erekshe tartysty boldy. Úsh komanda teń upaı jınap, sheshýshi sátte komandalardyń jetekshileri blıs-saýaldarǵa jaýap berip, júldeli oryndar sol arqyly anyqtaldy:

• 3 oryn – Álıhan Bókeıhan atyndaǵy №15 tirek mektep-lıseıi (Jýaly aýdany) – LENOVO noýtbýgi (5 dana)
• 2 oryn – Qulan tirek mektep-gımnazıasy (Turar Rysqulov aýdany) – iPad plansheti (5 dana)
• 1 oryn – Nyǵmetýlla Kıikbaev atyndaǵy mektep-gımnazıasy (Baızaq aýdany) – MacBook noýtbýgi (5 dana) jáne altyn medal.

Júldegerlerdi marapattaý rásimine Jambyl oblysy ákiminiń birinshi orynbasary Nurjan Kalenderov pen oblystyq bilim basqarmasy basshysynyń orynbasary Lázzat Qyzylqulova qatysty.

Kópshilikti qyzyqtyrǵan suraq – «Bul joba kelesi maýsymda jalǵasa ma?» boldy. Uıymdastyrýshylar bul bastama oblys ákimi men bilim basqarmasynyń qoldaýymen jalǵasatynyn qýana jetkizdi.

«Oı sheberi» – jas býyndy kitapqa baýlý, bilimge yntalandyrý jáne ıntellektýaldy qoǵam qalyptastyrý jolyndaǵy mańyzdy bastamaǵa aınaldy. Qatysýshylardyń qýanyshy, jastardyń qyzyǵýshylyǵy men demeýshilerdiń qoldaýy jobanyń bolashaǵy zor ekenin kórsetti.