جامبىل وبلىسىندا جاستاردىڭ كىتاپقا دەگەن قىزىعۋشىلىعىن ارتتىرىپ، ينتەللەكتۋالدى الەۋەتىن كوتەرۋگە باعىتتالعان «اۋليەاتا — كىتاپ وقيتىن ءوڭىر» جوباسى قارقىندى دامىپ كەلەدى. سونىڭ ەڭ جارقىن باستامالارىنىڭ ءبىرى – بيىل العاش رەت ۇيىمداستىرىلعان «وي شەبەرى» زياتكەرلىك ويىنى. شارا جامبىل وبلىستىق «ءمولدىر بۇلاق» وقۋ-ساۋىقتىرۋ ورتالىعىندا ءوتتى جانە مىڭداعان جاسقا جاڭا مۇمكىندىك سىيلادى، دەپ حابارلايدى Dalanews.kz
بۇل جوبا ءوڭىردىڭ مادەني-رۋحاني ومىرىندە ەرەكشە ورىن الۋدا. ونىڭ باستى ماقساتى – ينتەللەكتۋالدى ورتانى قالىپتاستىرۋ، جاستاردىڭ كىتاپقا دەگەن قىزىعۋشىلىعىن كۇشەيتۋ، ءوي-ورىسىن كەڭەيتۋ جانە شىعارماشىلىق الەۋەتىن دامىتۋ. «اۋليەاتا — كىتاپ وقيتىن ءوڭىر» اياسىندا وسى ۋاقىتقا دەيىن «وقۋشىلار ليگاسى»، «دارىندى مەكتەپتەر ليگاسى» جانە «تەحنيكالىق جانە كاسىپتىك ءبىلىم بەرۋ ۇيىمدارى ليگاسى» بويىنشا 15 ويىن وتكىزىلىپ، 400 كوماندا، شامامەن 2000 كىتاپ قامتىلدى. بۇل كورسەتكىش جاستاردىڭ بىلىمگە دەگەن قۇشتارلىعى ارتىپ كەلە جاتقانىن كورسەتەدى.
زياتكەرلىك سايىس ەرەكشە فورماتىمەن دە كوزگە ءتۇستى. قاتىسۋشىلارعا ءارتۇرلى تاقىرىپتاردى قامتيتىن سۇراقتار، لوگيكالىق تاپسىرمالار جانە تانىمدىق ساۋالدار ۇسىنىلدى. بارلىق ويىندار ءادىل ءارى اشىق ءوتتى. جاستار ءبىلىمىن سىناپ قانا قويماي، جاڭا تاجىريبە جيناقتاپ، لوگيكالىق ويلاۋ قابىلەتىن دامىتتى. سايىس بارىسىندا دوستىق پەن سەرىكتەستىك احۋالى ەرەكشە سەزىلدى. بۇل ويىندار جاستار اراسىنداعى مادەني جانە رۋحاني بايلانىستاردى نىعايتىپ، ولاردى بىر-بىرىمەن جاقىنداتا ءتۇستى.
«وي شەبەرى» ويىنى ۋاقىت وتە مازمۇنىن كەڭەيتىپ، جاڭا ادىستەمەلىك باعىتتارمەن تولىقتىرىلۋدا. قاراپايىم ءبىلىم جارىسى عانا ەمەس، جاس بۋىننىڭ كرەاتيۆتى ويلاۋ قابىلەتىن جەتىلدىرەتىن الاڭعا اينالدى. جوبا كىتاپ وقۋ مادەنيەتىن دارىپتەۋدە جانە بىلىمگە قۇشتار جاستاردىڭ قاتارىن كوبەيتۋگە باعىتتالعان.
ويىندار ءۇش ءتۇرلى ليگا بويىنشا ۇيىمداستىرىلدى.
وقۋشىلار ليگاسى – جالپى ورتا ءبىلىم بەرۋ ۇيىمدارىنىڭ وقۋشىلارى ءۇشىن وتكىزىلدى. جىل بويى وتكەن 11 ويىندا جۇزدەگەن كوماندا ب ا ق سىناپ، تەك ۇزدىكتەر عانا گراند فينالعا جولداما الدى. باستاپقىدا 350-دەن استام كوماندا جارىسقا قاتىسىپ، فينالعا ەڭ مىقتى 11 توپ قانا شىقتى. ولار 2 ميلليون تەڭگەلىك جۇلدە قورىنا تالاسۋ ءۇشىن كۇرەستى. گراند فينالعا قاتىسۋشىلارعا الدىن الا 20 ءتۇرلى كىتاپ ۇسىنىلىپ، سولار بويىنشا سۇراقتار دايىندالدى.
فينالدا ب ا ق سىناعان كوماندالار قاتارىندا:
- مەركى اۋدانىنان – سىپاتاي الىبەك ۇلى اتىنداعى №19 ورتا مەكتەبى؛
- تۇرار رىسقۇلوۆ اۋدانىنان – قۇلان تىرەك مەكتەپ-گيمنازياسى؛
- مويىنقۇم اۋدانىنان – شىعاناق ورتا مەكتەبى؛
- سارىسۋ اۋدانىنان – مۇحتار اۋەزوۆ اتىنداعى مەكتەپ-گيمنازياسى؛
- جامبىل اۋدانىنان – مۇحتار اۋەزوۆ اتىنداعى ورتا مەكتەبى؛
- تالاس اۋدانىنان – احمەت بايتۇرسىن ۇلى اتىنداعى گيمنازيا؛
- جۋالى اۋدانىنان – ءاليحان بوكەيحان اتىنداعى №15 تىرەك مەكتەپ-ليسەيى؛
- بايزاق اۋدانىنان – نىعمەتۋللا كيىكبايەۆ اتىنداعى مەكتەپ-گيمنازياسى؛
- شۋ اۋدانىنان – اباي اتىنداعى ورتا مەكتەبى؛
- تاراز قالاسىنان – №15 مەكتەپ-گيمنازياسى جانە №23 ورتا مەكتەبى.
ايتا كەتەرلىگى، فينالدا ەكى مۇحتار اۋەزوۆ اتىنداعى مەكتەپ جانە ەكى №15 مەكتەپ كەزدەستى – بۇل دا ءبىلىم دوداسىنداعى قىزىقتى ساتتەردىڭ ءبىرى بولدى.
دارىندى مەكتەپتەر ليگاسى دا ەرەكشە تارتىستى ءوتتى. بۇل باعىتقا وبلىستىڭ مامانداندىرىلعان مەكتەپتەرىنەن 20 كوماندا ءوتىنىش بەرىپ، ولاردىڭ ىشىنەن ۇزدىك 11 توپ اقتىق سىنعا جەتتى. قاتىسۋشىلاردىڭ ءارقايسىسى 16 كىتاپ وقىپ دايىندالدى. جۇلدە قورى – 1،2 ملن تەڭگە بولدى. ءۇش كەزەڭنىڭ ناتيجەسى قوسىلىپ، جەڭىمپازدار انىقتالدى:
- 3 ورىن – اباي اتىنداعى دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن مەكتەپ-گيمنازياسىنىڭ «ءتاستۇيىن» توبى (300 000 تگ)
- 2 ورىن – «دارىن» ليسەي-ينتەرناتىنىڭ «سامۇرىق» توبى (400 000 تگ)
- 1 ورىن – «ءبىلىم-يننوۆاسيا» ليسەي-ينتەرناتىنىڭ «رۋحانيات» توبى (500 000 تگ جانە «وي شەبەرى» كۋبوگى).
جەڭىمپازداردى جامبىل وبلىسى اكىمدىگىنىڭ ءبىلىم باسقارماسى جانىنداعى «جامبىل دارىنى» ورتالىعىنىڭ ديرەكتورى مايرا ەسەنالييەۆا ماراپاتتادى.
تەحنيكالىق جانە كاسىپتىك ءبىلىم بەرۋ ۇيىمدارى ليگاسى دا بيىل جاستاردىڭ بەلسەندى قاتىسۋىمەن ءوتتى. بۇل ليگاعا 25 كوماندا قاتىسىپ، ىشىنەن ۇزدىك 13 توپ فينالعا جەتتى. جۇلدە قورى – 1،2 ملن تەڭگە. قاتىسۋشىلار 15 كىتاپ وقىپ دايىندالدى. قورىتىندىسىندا:
- 3 ورىن – قورداي اۋدانىنىڭ «بەرەكە» كوللەدجىنىڭ توبى (300 000 تگ)
- 2 ورىن – جامبىل مەديسينالىق جوعارى كوللەدجى (400 000 تگ)
- 1 ورىن – اباي اتىنداعى جامبىل گۋمانيتارلىق جوعارى كوللەدجى (500 000 تگ جانە «وي شەبەرى» كۋبوگى).
فينالدىق باسەكەنىڭ تاعى ءبىر جاڭالىعى – سۇراقتاردى ازىرلەۋدە جاساندى ينتەللەكت قولدانىلۋى. بۇل ويىنعا جاڭا تەحنولوگيالىق سيپات بەرىپ، قاتىسۋشىلارعا جاڭا تاجىريبە سىيلادى. سونىمەن بىرگە شاراعا «جامبىل دامۋ» قورى، «جامبىل تاراز» گازەتى جانە «اۋليەاتا ترانسپاسس» كومپانياسى دەمەۋشىلىك كورسەتتى.
گراند فينال قورىتىندىسى دا ەرەكشە تارتىستى بولدى. ءۇش كوماندا تەڭ ۇپاي جيناپ، شەشۋشى ساتتە كوماندالاردىڭ جەتەكشىلەرى بليس-ساۋالدارعا جاۋاپ بەرىپ، جۇلدەلى ورىندار سول ارقىلى انىقتالدى:
- 3 ورىن – ءاليحان بوكەيحان اتىنداعى №15 تىرەك مەكتەپ-ليسەيى (جۋالى اۋدانى) – LENOVO نوۋتبۋگى (5 دانا)
- 2 ورىن – قۇلان تىرەك مەكتەپ-گيمنازياسى (تۇرار رىسقۇلوۆ اۋدانى) – iPad پلانشەتى (5 دانا)
- 1 ورىن – نىعمەتۋللا كيىكبايەۆ اتىنداعى مەكتەپ-گيمنازياسى (بايزاق اۋدانى) – MacBook نوۋتبۋگى (5 دانا) جانە التىن مەدال.
جۇلدەگەرلەردى ماراپاتتاۋ راسىمىنە جامبىل وبلىسى اكىمىنىڭ ءبىرىنشى ورىنباسارى نۇرجان كالەندەروۆ پەن وبلىستىق ءبىلىم باسقارماسى باسشىسىنىڭ ورىنباسارى ءلاززات قىزىلقۇلوۆا قاتىستى.
كوپشىلىكتى قىزىقتىرعان سۇراق – «بۇل جوبا كەلەسى ماۋسىمدا جالعاسا ما؟» بولدى. ۇيىمداستىرۋشىلار بۇل باستاما وبلىس اكىمى مەن ءبىلىم باسقارماسىنىڭ قولداۋىمەن جالعاساتىنىن قۋانا جەتكىزدى.
«وي شەبەرى» – جاس بۋىندى كىتاپقا باۋلۋ، بىلىمگە ىنتالاندىرۋ جانە ينتەللەكتۋالدى قوعام قالىپتاستىرۋ جولىنداعى ماڭىزدى باستاماعا اينالدى. قاتىسۋشىلاردىڭ قۋانىشى، جاستاردىڭ قىزىعۋشىلىعى مەن دەمەۋشىلەردىڭ قولداۋى جوبانىڭ بولاشاعى زور ەكەنىن كورسەتتى.
