Jambyl oblysynda Ádilet basqarmasy basshysynyń orynbasary Baýyrjan Shamǵunov pen onyń orynbasary Berikbol Baiuzaqovqa qatysty qylmystyq is sotqa joldandy, dep habarlaidy Dalanews.kz.
Tergeý dereginshe, sheneýnikter jeke sot oryndaýshylarynan litsenziiasynan aiyrmaý úshin júieli túrde para alyp otyrǵan. Para kólemi 100 myń teńgeden bastalǵan.
Ulttyq qaýipsizdik komitetiniń qyzmetkerleri kúdiktilerdi shamamen bir ai buryn ustaǵan. Tergeý kezinde ekeýi de óz kinásin moiyndaǵan.
Qylmystyq is jedeldetilgen tártippen qaralady. Eger kinálary dáleldense, Shamǵunov pen Baiuzaqov 12 jylǵa deiin bas bostandyǵynan aiyrylýy múmkin.
Aita keteiik, buǵan deiin Qostanaida Rýdnyi qalasynyń burynǵy prokýrory Murat Ýspanovqa úkim shyqqan edi. Ony qurylys bólimindegi tekserýlerdi toqtatý úshin 20 mln teńge para alý áreketinde aiyptaǵan.
Murat Ýspanov óziniń kinásin moiyndady, sondyqtan is qysqartylǵan tártippen qaraldy. Úsh otyrystan keiin sot úkim shyǵardy.
Rýdnyi qalasynyń burynǵy prokýrory orta qaýipsizdigi bar koloniiada 4,5 jylǵa bas bostandyǵynan aiyryldy jáne memlekettik qyzmette jumys isteýge ómir boiyna tyiym salyndy. Sonymen qatar, ol «quqyq jónindegi aǵa keńesshi» sheninen aiyryldy.
Oǵan berilgen jaza merzimi jumsartatyn jaǵdailarǵa bailanysty aitarlyqtai qysqartyldy – kámeletke tolmaǵan balalarynyń bolýy, ókinýi jáne kinásin moiyndaýy.
