Almaty oblysy Talǵar aýdanyna qarasty Aqtas aýylyndaǵy №36 jalpy bilim beretin orta mekteptiń sharýashylyq bóliminiń qyzmetkeri Serikjan Bekmuratov bilim ordasyndaǵy bylyqtar týraly aitty. Onyń sózinshe, 2023 jyldan beri atalǵan bilim ordasynda memlekettik múlikti talan-tarajǵa salý, qyzmettik ókilettikti asyra paidalaný jáne biýdjettik qarjyny maqsatsyz jumsaý faktilerine kýá bolyp keledi. Serikjan Bekmuratov Dalanews.kz-ke mán-jaidy egjei-tegjeili aityp berdi.
Serikjan Bekmuratov mekteptegi bylyqtar týraly áleýmettik jelide úndeý jasaǵan bolatyn. Sebebi mektep gazben qamtylsa da, bilim ordasynyń basshylyǵy tonnalap soliarka satyp alǵan.
"2023 jyldan beri qarsylasyp kele jatyrmyn. Sebebi sol jyly qyrkúiekte Talǵar aýdanyna qarasty Aqtas aýylyndaǵy №36 mektepke 108 tonna soliarka keldi. Biraq bizdiń mektep bir jyl buryn, iaǵni 2022 jyly tolyqtai gazben qamtylǵan bolatyn. Men qosymsha qujatty (nakladnoi) kórip, birden bizge soliarka kerek emes ekenin aittym. Ol kezde sharýashylyq bóliminiń orynbasarynyń ornyna qalǵan edim. "Qabyldamaimyz, bul durys emes" dedim. Ol sátte mektep direktorynyń qyzmetin ýaqytsha Dinara Sálimjanova degen kisi atqarǵan", - deidi Serikjan Bekmuratov.
Dinara Sálimjanova aýdanǵa ketip, keiin qaitadan kelip, "aǵa, soliarkany tez tez qabyldap alý qajet, bolmasa bizdi qurtady" degen.
"Men "joq, qabyldamaimyz" dedim. Týra sol kúni aýdanda Soltanbaev Serik Espanuly degen kisi meni shaqyryp, "mynany qabyldańyz" dedi. Men mektep tolyq gazben qamtylǵanyn, bizge soliarkanyń qajeti joǵyn aittym. "Men ne aittym sony oryndaisyz, nemese jumystan ketesiz" dedi. Men qabyldamaitynymdy aittym. Mektep direktory ashýlanyp, "nege qabyldamaisyń? qaidaǵy bir sharýashylyq meńgerýshisisiń, qabyldamasań meni direktorlyqqa bekitpeidi, qol qoi da jiber, bul jylda bolatyn jumys, aýdan ózi retteidi" dedi. Men taǵy kelispeitinimdi aityp qol qoimai qoidym. Sóitip eńbek demalysynda jatqan sharýashylyq bóliminiń orynbasary Bolat Chemchekov degen kisini shaqyryp, sol kisi qabyldap aldy", - deidi ol.
Ertesi Serikjan Bekmuratovty mektep direktory shaqyryp, ony oqý bóliminiń bastyǵy Ainagúl Úshkempirova shaqyrtyp jatqanyn aitqan.
"Baryp edim "sen kimsiń? myna qujatqa qol qoi" dedi. "Qabyldamaimyn. Bizdiń mektep 2022 jyldan beri gazben qamtylǵan. Soliarkanyń bizge qajeti joq" dep edim, meni jumystan shyǵarý keregin aitty. Bul zańsyz ekenin, olar sybailas jemqorlyqpen ainalysyp jatqanyn aittym", - deidi Serikjan Bekmuratov.
Osy jaittardan keiin basshylyqtaǵy adamdar onyń artyna túsken.
"Direktordyń mindetin ýaqytsha atqarǵan Dinara Sálimjanova basqa mektepke aýysyp ketti. "Ne alǵan "doliańyz joq, osy jerde qaldyńyz" dedi maǵan. Men 40 jyl qyzmetimdi adal jumys istedim. Jemqorlyqqa basymdy tyqpaimyn. Keiin onyń ornyna Gúljanat Toqtybaeva degen kisi keldi. Birge Murat Sailybaev degen jańa sharýashylyq meńgerýshisi keldi. Buryn bolǵan Bolat Chemchekov degen kisi zeinetke shyǵyp, maǵan "endi senimen ainalysady, sen Serik Soltanbaevpen oinapsyń, ol oqý bóliminiń basshysynyń "ámiiany". Qyzmetten kim ketetinin, kim qalatynyn sol sheshedi" dedi. 2025 jyldan beri bizdiń aýdanda mektepke jumysqa kiretin muǵalimder 1,2 million teńge berip kiredi. Ony búkil halyq biledi", - deidi Serikjan Bekmuratov.
Onyń sózinshe, jańa direktor da qujattardy tekserýdi talap etken. Serikjan Bekmuratov qujattardy bir ai boiy tekserip, kem-ketigin kórsetken. Nátijesinde 60-70 million teńge kem bolyp shyqqan.
"Bolat Chemchekovtiń mamandyǵy da joq. Al jańa direktormen kelgen Murat Sailybaev degen kisiniń de bilimi joq. Biraq sharýashylyq bóliminiń basshysy etip qoidy. Jańa direktor aýdanǵa baryp kelgen soń "aǵa, siz jumystan ketińiz. bolmasa bále bolady" dedi. Men ketpeimin, eshqandai kinám joq dedim. Toqtybaeva da meniń artyma túsip, áli kúnge deiin júr. Aryzdanbaǵan jerim joq. Osy bylyqty dáleldegen kúni ǵana mektepten ketemin", - deidi Serikjan Bekmuratov.
Murat Sailybaev aýdanda "krysham bar" dep eskertipti.
"Murattyń aitýynsha, memlekettik satyp alý bóliminiń basshysy Maira Bosynbaevanyń týysy eken. Sol arqyly sharýashylyq bólimine kelip otyr eken. Murat kelip, maǵan kúsh kórsetip, "nege aryz jazasyń, men paida tabýym kerek, bul Úshkempirovanyń biznesi" dep otyr. Sonda halyqtyń salyǵynan jinalǵan aqshany kásipke ainaldyrǵan. Murat ertesi kelip maǵan pyshaq taqady. "Endi aryz jazsań ólesiń" dedi", - deidi Serikjan Bekmuratov.
Serikjan Bekmuratov shilde aiynda bir, qyrkúiek aiynda taǵy bir úndeý jariialaǵan soń ǵana Murat Sailybaev qyzmetinen ketken. Keiinnen direktor Toqtybaeva da qyzmetinen ketken.
Ol birneshe jerge shaǵymdanǵan. Alaida qarabaiyr resmi jaýaptar ǵana kelgen.
"Olar aýditqa jiberdi. Olardan Talǵat Ábishev degen kisi kelip, ol meniń ózimnen aqsha surady. "Maǵan 5 million berseń aýdit nátijesinde kemshilikterdi jazyp beremin" dedi. Fakt tur, nege jazbaisyń desem "bastyqtar "doliada otyr" dedi. Aýdit basshysy Botanov degen kisige jazyp edim, meni shaqyryp "qaita baryp tekseremiz" dep, keiinnen "qaita tekserýge jatpaidy" degen jaýap keldi", - deidi Serikjan Bekmuratov.
Rasynda, Serikjan Bekmuratov jariialaǵan úndeýge Talǵar aýdanynyń bilim bólimi tekseris júrgizilip, tekseris sheshimi boiynsha shaǵym "negizsiz ekeni dáleldengen" dep jaýap bergen.
Shaǵym boiynsha Talǵar aýdanynyń prokýratýrasy, Ishki baqylaý departamenti (DVK), aýdit, Eńbek inspektsiiasy tarapynan tekseris júrgizilip, tekseris sheshimi boiynsha shaǵymyńyzdyń negizsiz ekeni dáleldengen. Sheshim jaýabymen tanystyrylǵansyz. Áleýmettik jelide jariialanǵan negizsiz aiyptaýlar men jalǵan aqparat boiynsha QR-nyń Ákimshilik quqyq buzýshylyq týraly kodeksiniń 73-3-babynyń 3-tarmaǵynda kózdelgen jaýapkershilikke tartylýyńyz múmkin ekendigin arnaiy eskertemiz.
Al óziniń shyndyǵyn dáleldeýge tyrysyp júrgen azamat áli de shaǵymdana beretinin aitty. Jýyrda áleýmettik jeli arqyly memleket basshysyna, bas prokýratýraǵa úndeý joldaǵan.
"Gazben qosylǵan mektepke qalaisha 108 tonna soliarkaǵa tapsyrys beredi? Bul baryp turǵan jemqorlyq. Oqý bóliminiń bastyǵy Ainagúl Úshkempirovany ne ornynan alǵan joq. Demek sybailas qoi. "Eshteńe istei almaisyz" dedi. Basymdy tigip otyrmyn. Úshkempirova meni qorqytyp, banditterdi jiberedi", - deidi Serikjan Bekmuratov.
Onyń sózinshe, qazirgi ýaqytta belgisiz bireýler qoqan-loqy kórsetip, qorqytyp júrgender bar. Mektepke kelgen jańa direktor da Serikjan Bekmuratovty suraqqa alyp, artyna túsken kórinedi.
"Bular meni óltire almai ǵana kele jatyr. "Kólik qaǵyp ketedi, basyńa kirpish túsip ketedi" dep qorqytady. Aýdandaǵy qyzmetker Rústembek Myńbaev habarlasyp, meni sotqa beretinin aitty. Jaqsy, ber dedim. Jaýap berýge daiynmyn. Qazir jalǵyz ózim kúresip, ómirim qyl ústinde tur. Ómirime qaýip tónip tur", - deidi ol.
Aita keteiik, Serikjan Bekmuratov aityp otyrǵan máselelerge qatysty qujattyń bári redaktsiiada bar.
