J. Erman Talǵat Ermegiiaevqa arasha tústi
Aqyn óz úndeýin Feisbýk áleýmettik jelisindegi paraqshasynda jariialady.
«Sizdiń jalǵyz balańyz Talǵat sotty bolǵannan beri onyń taǵdyryna aitys aqyndary qatty alańdaýly. Sebebi biz Sizdi atamura ónerimiz Aitysty ulttyq deńgeide riiasyz qoldap, onyń kóshin órge súiregen metsenat retinde baǵalaimyz.
Qazaqstandaǵy ondaǵan aitystardy qarjylai qoldap, aitysty Máskeý men Parijge aparyp ult rýhyn asqaqtatqan janqiiarlyǵyńyzdy Alash balasy umytpaidy. Sizdiń temir tulparlaryńyz talai aityskerge qanat bailady. Jazba poeziianyń Q.Myrzaáliev, T.Moldaǵaliev, S.Imanasov sekildi ondaǵan dúldili Sizden at minip, bakiǵa riza attandy.
Ábdimomyn Jeldibaev, Muhamedjan Tileýhanov, Bilál Ysqakov syndy daraboz kúishiler de temir tulpardyń tizginin ustady.
Qansha músháira ótkizip, qansha kitap shyǵaryp berip, qaiyrym jasadyńyz. Qasym Amanjolovtyń tomdary, Kazybek bidiń óz shapany, Mádidiń ǵajap tas beinesi Sizdiń qarjylai qoldaýyńyzben el igiligine ainaldy.Táttimbet murasy da konservatoriiadaǵy synyp pen qalyń kitap bolyp qamqorlyq kórdi. Sanap taýysa almaimyz.
Ult rýhaniiatyna dál Sizdei júieli ári naqty kómek jasaǵan eshkim joq. Ol az bolsa, "Otan" partiiasyna adamshylyq kelbet berip, Elbasymen birge partiianyń qurylymdaryn uiymdastyryp, ǵimarattar ashyp, jergilikti uiymdaryn qurýǵa qairat jumsadyńyz. Osynyń bári elge de, ELBASYǴA da, partiiaǵa da aian. Balańyz Talńat bolsa London olimpiadasyndk Qazaq Eline JETI altyn ápergen, sol úshin Prezidentten orden alǵan aqjoltai oǵlan edi. Ondai halyqaralyq abyroi qazaq basyna endi qashan buiyrmaq?! Halyqaralyq dodalarda sportshynyń qairatyna qosa Sport ministriniń jeke iskerligi de barlyk máselelerdi sheshýde qansha rol atqaratynyn álem biledi. Ol qupiia emes. Talǵattan keiingi ministrler myqty bolsa qaida júr? Halyq kýá.
Aqyndar aitpai jatqan joq. Astanadaǵy aitysta:
Uiada úlgi kórgen tekti qyran
Taýyktyń tarysyna tamsanbaidy.
«EKSPONYŃ» aqshasyn jeý túgili
Ákesiniń dáýletin taýysa almaidy!, - dep bar daýyspen aitty goi Aqyn.
Odan keiin de aityp jatyr. Biraq, osy halyq daýsy Patshamyzǵa jetken joq qoi. Jetse, óz qolymen baýlyp ósirgen ulanyn ozi býyndyrmas. Qazir buqaralyq aqparat quraldary aityp júrgendei sonsha qarjyny T.Ermegiiaev óz betinshe jumsamaǵanyn halyq ta ańǵaryp otyr. Bizdiń qogamdaǵy jemqorlyq júiesiniń shemasyn okýshy balalar da boljai biledi. Ol memleket basshysyna da aian, isharalap bolsa da aityp júr ǵoi.
Sondyqtan, keshe ǵana bilik partiiasynyń tizginin óz qolyńyzǵa ustatyp, táýelsiz Qazaqstandy birge qurysqan ult kósemi - N.A.Nazarbaevtyń aldyna Siz barýǵa tiissiz. Talǵat áldekimder qusap elden qashqan joq. Elde. Memleket qarjysynan aýysqany-túiiskeni bolsa kaitarsyn. Qatelesken shyǵar. Jazǵan shyǵar, jańylǵan shyǵar. Balasy úshin adam otqa da, sýǵa da túspek. Elbasydan keshirim surańyz. Qajet bolsa aiaǵyna jyǵylyńyz. Uǵynar. Keshirer. Onyń da óz balasy ǵoi. Balanyń qapysyn atasy kesher, danyshpan qazaqpyz ǵoi. Qanymyzda kekshildik joq, meiirbandyǵymyz ózgelerge úlgi bolsyn. Sabaq bolsyn. Elbasynyń qabyldaýyna buryn suranbasańyz, endi suranyńyz. Buryn qabyldamasa, endi qabyldar.
Halyktyń sýiikti balasynyń basyndaǵy osy bult seiilip, patshadan qaiyrymdylyq tabylsa, qoǵamnyń da arqasynan júk túskendei bolar edi. Azamattarynyń barshasyn sottai beretin qoǵamda súikim qala ma? Jasyńyz ulǵaiyp, belińiz búgilgen shaqta Sizge Alla qýat, patshamyzǵa sabyr bersin!», - deidi Júrsin Erman.
