Halyq qarsylyq bildirgennen keiin áýe sharlary festivaline qatysty másele biraz ýaqytqa deiin tynyshtalyp qalǵan-dy.
Sol kezde jurt áýe sharlary festivalin memleket qarjysyna ótkizýdiń qanshalyqty qajeti bar ekenin aityp, bul máseleni ótkir talqylaǵany esimizde.
Al ákimdik qyzmetkerleri bolsa, festival óńirdegi týrizmniń damýyna serpin bertinin, 30 myńnan astam adamnyń basyn qosatynyn aityp aqtalǵan edi.
Jiyn-toi ótkizýde aldyna jan salmaityn shendiler osylaisha bir festivalmen oblystaǵy týrizmdi damytyp jiberýdi kózdegen-di (festival ótkizip, týrizmniń damyp ketkenin estisek, qulaǵymyz kereń bolsyn!).
Biraq Almaty oblysy ákimdigi o bastaǵy oiynan áli bas tartpaǵany belgeli boldy.
Almaty oblysy ákimi Marat Sultaǵaziev bastaǵan shendiler festivaldi biýdjet qarysyna emes, óńirdegi kásipkerlerdiń qoldaýymen ótkizýdiń amalan taýypty.
Sonda biýdjet qarjysyn jiyn-toiǵa shashaýǵa bolamaidy, al kásipkerlerdiń jinalǵan qarjyny ońdy-soldy shasha berýge bolatyn boldy ǵoi. Qyzyq. Aqylǵa qonbaityn aqtalý ǵoi.
Aitpaqshy, ákimdik «Myń boiaýly aspan» degen ataýǵa ie bolǵan áýe sharlary festivalin Qonaev qalasynda shilde aiynda josparlap otyrsa kerek. Sharaǵa dúniejúziniń birneshe áýe sharlaryn ushyratyn komanda qatysyp, Almaty oblysynyń aspanynan 25 dirijabldi kótermekshi.
Aitqanynan qaitpaityn ákimdik óńirdegi kásipkerlerdiń qoldaýymen osy is-sharany ótkizýge tas-túiin bekingen syńaily. Endi halyq qansha talqylap, synasa da ákimdik raiynan qaitpaýy múmkin. Bul iske Toqaev aralaspasa, «halyq sózin qulaq astatyn» (sondai tujyrymdama bar emes pe edi?) ákimdikti baiqamadyq. Óitkeni sharany kásipkerlerdiń qoldaýymen ótkizedi. Ákimdiktiń argýmenti tastai.
Aitpaqshy, festivaldi ótkizýge qajetti 183 mln teńgeni kásipkerler de jinap berýge asyǵyp otyrsa kerek...
Eń bastysy shendiler «Myń boiaaýly aspan» festivali Almaty oblysynyń týristik áleýetin álemge tanytyp, dúniejúzi týristeriniń nazaryn ózine aýdaratyndaryna senimdi.
Ádette damyǵan elderde mundai is-sharalardy jergilikti bilik oryndary emes, týristik uiymdar ózderi uiymdastyratyny belgili. Al bizdiń ákimdikter naqty jumys isteýdiń ornyna festivalder men kitaptar shyǵarýǵa áýes.
Eger kásipkerlerden jinalǵan qarjyǵa Qapshaǵaidyń jaǵalaýyn tazartyp, onshaqty ájethana salsa, týrizmniń damýyna qosylaǵan paidaly is sol bolar edi. Biraq ákimdikte festival ótkizýge qatty qumartyp otyr.
Elimizdegi aqparat quraldary tarapynan synǵa ushyraǵan áýe sharlary festivalin ákimdikke qarasty aqparat quraldary jazǵannan keiin dúniejúziniń týristeri Qonaevqa aǵylatyn shyǵar? Sodan keiin Almaty oblysyna qarasty aqparat quraldaryna Tesla, Samsung, Toyota syndy alpaýyt kompaniialar jarnama berýge kezekke turýy múmkin.
Qaitemiz, Qudai soǵan jetkizsin! Ákimdiktiń de bir oilaǵany bar shyǵar?
Nurlan JUMAHAN
