Osy aptada keri bailanys ornady. Ishki ister ministrligi óte «jumsaq» tásilmen jaýap qaitarypty. «Ógizdi de óltirmei, arbany da syndyrmai» bergen jaýap hattyń mazmunynan túsingenimiz, Tatiana Podshibiakinanyń qos azamattyǵy týraly másele bireýdiń jeke basynyń qupiiasy sanalady eken.
Ony jariialaý zań boiynsha tyiym salynatyn kórinedi. Sondyqtan, Podshibiakina týraly aqparatty bizge bere almaityndaryn aitypty. Shyǵaryp salma jaýaptyń tolyq mazmuny tómendegidei:
«Derbes derekter jáne olardy qorǵaý týraly» Zańǵa sáikes derbes derekterdi taratý sýbektiniń (Derbes derekterge jatatyn jeke tulǵanyń) nemese onyń zańdy ókiliniń kelisimimen, sondai-aq «Sáikestendirý nómirleriniń ulttyq tizimderi», Qazaqstan Respýblikasy Zańynyń 11-babynyń 2-tarmaǵyna sáikes tulǵaǵa qatysty aqparatty jeke tulǵanyń jazbasha kelisiminsiz basqa adamǵa berýge bolmaidy.
Tiesiligi nemese azamattyǵy joqtyǵy týraly málimetter qoljetimdiligi shekteýli derekter jatady, osyǵan bailanysty suratylǵan adamǵa qatysty aqparat onyń nemese zańdy ókiliniń kelisimimen berilýi múmkin.
Sonymen qatar, Sizdiń saýalyńyzda kórsetilgen adamǵa qatysty Jambyl oblysy politsiia departamenti Kóshi-qon qyzmeti basqarmasynyń qyzmetkerleri shet memlekettiń azamattyǵyn anyqtaý boiynsha barlyq sharalardy qabyldaǵanyn habarlaimyz.
Bul rette, Qazaqstan Respýblikasynyń azamattarynda shet memleket azamattyǵynyń bar ekendigi rastalǵan kezde olarǵa qatysty zańnamaǵa sáikes sharalar qabyldanady, onyń ishinde Qazaqstan Respýblikasynyń azamattyǵynan aiyrylýyn tirkeý júrgiziledi.
Orys aǵyny áli de ózekti. Jyl basynan beri qansha Resei azamatyna JSN berildi? Qanshasy Qazaqstan azamattyǵyn aldy? Resmi aqparattarda aitylyp júrgendei, elimizge kelgen 1,6 million reseiliktiń qanshasynda qos azamattyq bar?
Qos azamattyq – dál qazir kún tártibindegi eń ózekti másele. Sondyqtan, Dalanews.kz saity bul máseleni únemi nazarda ustaidy. Taqyrypty qoǵam talqysyna tastap, memlekettiń ishki turaqtylyǵyna syzat túsiretin osyndai bassyzdyqtardy boldyrmaý úshin quzyrly mekemelerden Tatiana Podshibiakinanyń qos azamattyǵyna qatysty máselege atústi qaramaýlaryn suraidy.
Qazaqstan Prezidenti Qasym-Jomart Toqaev jyl basynda ulttyq qoǵamdyq senim keńesiniń otyrysynda qos azamattyǵy bar adamdarǵa qatań jaza qoldaný kerektigin aitqan bolatyn. Sondai-aq Memleket basshysy óziniń Joldaýynda da eki memlekettiń qujatymen júrgen memlekettik qyzmetkerler men mekeme basshylaryna eshqandai keshirim bolmaitynyn eskertken bolatyn. Sonda ishki ister ministrligi Prezidenttiń bul eskertýine qulaq aspai otyr ma?
Biz Tatiana Podshibiakinanyń qos azamattyǵynyń bar-joǵyn anyqtaý týraly Ishki ister ministrligine ǵana emes, Qazaqstan Kóshi qon politsiiasyna, Qazaqstan Bas Prokýratýrasyna, QR Eńbek jáne halyqty áleýmettik qorǵaý ministri Tamara Dúisenovaǵa jáne Jambyl oblystyq Prokratýraǵa, Qordai aýdandyq Prokratýraǵa da dál osyndai hat jibergenbiz. Olardan eshqandai jaýap hat kelmedi. Aty atalǵan mekemelerden áli de kóńilge qonymdy jaýap kútemiz!
Jaras KEMELJAN
