Irandaǵy soǵys pen jahandyq saýda baǵyttarynyń ózgerýi Qazaqstannyń temirjol infraqurylymyn damytý josparyna jańa serpin berdi. Eýropa men Qytai arasyndaǵy júk tasymalyna suranys artyp, Qazaqstan arqyly ótetin tranzittik dálizderdiń mańyzy kúsheiip otyr, dep habarlaidy dalanews.kz Bloomberg-ke silteme jasap.
Ásirese, «Orta dáliz» dep atalatyn Transkaspii halyqaralyq baǵytyna qyzyǵýshylyq artqan. Bul marshrýt Qytaidy Qazaqstan, Ázerbaijan, Grýziia jáne Túrkiia arqyly Eýropamen bailanystyrady. Resei aýmaǵy arqyly ótetin tranzit kólemi azaiǵannan keiin atalǵan dálizdiń júktemesi birneshe ese ósip, tasymal kólemi turaqty túrde ulǵaiyp keledi.
Osyǵan bailanysty Qazaqstan aýqymdy temirjol modernizatsiiasyn qolǵa aldy. Elde jańa temirjol jelileri salynyp, qoldanystaǵy baǵyttardyń ótkizý qabiletin 2030 jylǵa qarai 100 mln tonnaǵa deiin jetkizý josparlanyp otyr.
Ulttyq temirjol operatory infraqurylymdy jańartýǵa milliardtaǵan dollar investitsiia quiyp jatyr. Sonymen qatar AQSh, Frantsiia jáne Qytaidan jańa lokomotivter satyp alynyp, Kaspii teńizi arqyly júk tasymalyn kúsheitý úshin jeke teńiz floty da damytylýda. Sarapshylar Kaspii baǵytyn Orta dálizdiń negizgi tar tusy dep baǵalaidy.
Budan bólek, «Qazaqstan temir joly» kompaniiasy Qytai men Eýropadaǵy terminaldyq qýattardy keńeitip, Eýroodaq aýmaǵyndaǵy jańa logistikalyq aktivterdi qarastyryp jatyr.
Sońǵy ýaqytta Qytai men Iran arasyndaǵy konteinerlik tasymal kólemi de aitarlyqtai ósken. Málimetterge sáikes, bir jyldyń ishinde bul baǵyttaǵy júk kólemi birneshe ese artqan.
