Iran Ormýz buǵazynda munai tankerine soqqy jasalǵanyn málimdedi, dep habarlaidy dalanews.kz.
Iran tarapynyń málimetinshe, Trend tankeri Ormýz buǵazy arqyly Tegeran «zańsyz baǵyt» dep ataǵan jolmen ótýge áreket jasaǵan. KSIR málimdemesinde keme soqqydan keiin órtenip, toqtaǵany aitylǵan.
KSIR Áskeri-teńiz kúshteriniń qolbasshysy, kontr-admiral Ali Ozmai Iran kúshteri strategiialyq sý jolyn baqylaýda ustap otyrǵanyn málimdedi. Onyń aitýynsha, Irannyń ruqsatynsyz buǵaz arqyly ótýge áreket jasaǵan kemeler joiylýy múmkin.
Alaida tankerge jasalǵan soqqy, órt jáne kemeniń keiingi jaǵdaiy týraly aqparat ázirge táýelsiz túrde rastalǵan joq. Associated Press te Irannyń málimdemesin birden táýelsiz rastai almaǵanyn habarlady. Keme bortyndaǵy ekipajdyń jaǵdaiy, zardap shekkender bar-joǵy men júktiń sipaty týraly da málimet joq.
Buǵan qosa, Ulybritaniianyń UK Maritime Trade Operations qyzmeti Ormýz buǵazynda Omannyń Hasab qalasynan soltústik-shyǵysqa qarai shamamen 30 shaqyrym jerde «qaýipsizdikke qatysty oqiǵa» tirkelgenin habarlaǵan. Alaida qyzmet oqiǵaǵa qatysy bar kemeniń ataýyn jariialamady. Sondyqtan bul oqiǵanyń dál Trend tankerine qatysty bolǵany ázirge belgisiz.
Iaǵni ázirge rastalǵany – Irannyń munai tankerine soqqy jasaǵany týraly málimdemesi. Oqiǵanyń naqty mán-jaiy men tankerdiń jaǵdaiy táýelsiz derekkózder arqyly naqtylanǵan joq.
