Qazaqstan Respýblikasynda mobildi qurylǵylardy verifikatsiialaý biryńǵai ári ashyq qaǵidalar boiynsha júzege asyrylady. Telefonnyń shyqqan eli tirkeýden bas tartýǵa negiz bola almaidy – basty talap – qurylǵynyń zańdy túrde ákelinýi jáne ony rastaityn qujattardyń bolýy. Eger qurylǵy resmi túrde importtalyp, tiisti tártippen rásimdelse, verifikatsiiadan kedergisiz ótedi, dep habarlaidy Dalanews.kz.
Qiyndyqtar kóbine "sur" import jaǵdaiynda týyndaidy – iaǵni kedendik rásimdeýsiz jáne mindetti tólemdersiz ákelingen qurylǵylar boiynsha. Mundai kezde júie qurylǵynyń zańdy ainalymda ekenin rastai almaidy, sondyqtan ótinim qabyldanbaidy.
Azamattar úshin verifikatsiia rásimi tolyqtai tegin. Áleýmettik jelilerde aitylyp júrgen 2 AEK kólemindegi tólem halyqqa qatysty emes. Importtaýshylar men resmi distribiýtorlar verifikatsiia qyzmetin alý úshin kommertsiialyq kelisimshart jasaidy, onyń quny – ár qurylǵyǵa 1 AEK. Alaida tólemniń ózi qurylǵynyń mindetti túrde tirkeletinin bildirmeidi. Negizgi shart – zańdy import pen kedendik jáne salyqtyq tólemderdiń tólengenin rastaý.
Osylaisha, verifikatsiia – barlyq qurylǵylardy aqyly tirkeý emes, olardyń zańdy ainalymda ekenin rastaýǵa jáne adal biznes pen tutynýshylar múddesin qorǵaýǵa baǵyttalǵan tetik.
IMEI-kodtardy tirkeýden bas tartýdyń sebepteri qandai? Buryn satyp alynǵan telefondarǵa qatysty jaǵdai qalai túsindiriledi?
Eń aldymen eki túrli jaǵdaidy ajyratyp alý qajet:
Jańadan ákelingen qurylǵyny verifikatsiialaý;
2025 jylǵy 25 maýsymǵa deiin jelide belsendirilgen burynǵy telefon boiynsha IMEI rastaý qajettiligi týraly habarlama.
Keibir qoldanýshylar jańa qurylǵyny verifikatsiialaý rásimin burynnan qoldanylyp júrgen telefonǵa qatysty habarlamamen shatastyryp jatady. SIM-kartany aýystyrǵanda nemese eSIM qosqanda, 2025 jylǵy 25 maýsymǵa deiin jelige qosylǵan qurylǵyǵa bailanysty SMS kelýi múmkin. Mundai jaǵdaida kóbine sol qurylǵynyń birinshi IMEI-i burynnan rastalǵan bolady. Júie tek ekinshi IMEI-di sol qurylǵyǵa bailanystyrýdy usynady.
Bul úshin jeńildetilgen ári tegin rásim qarastyrylǵan. Negizgi sharttar:
Qurylǵy birinshi IMEI boiynsha buryn tirkelgen bolýy tiis;
Eki IMEI de bir IIN-ge rásimdelýi qajet.
Jeńildetilgen tártip tek bir qurylǵyǵa qatysty, iaǵni birinshi IMEI rastalǵan jaǵdaida ǵana qoldanylady. Al eger qurylǵy jańa bolyp, IMEI-1 buryn verifikatsiiadan ótpese, onda zańdy import pen satyp alýdy rastaityn qujattar usynylatyn standartty rásim júrgiziledi.
Sondyqtan SIM-kartany aýystyrǵannan nemese eSIM qosqannan keiin kelgen SMS habarlama telefonnyń buǵattalǵanyn nemese tirkeýden bas tartylǵanyn bildirmeidi. Bul tek ekinshi IMEI-di rastaý qajettiligimen bailanysty.
Qurylǵylardy «ATS Mediafon KZ» JShS arqyly verifikatsiialaý tártibi qandai? Sait ótinimdi qabyldamasa ne isteý kerek?
Verifikatsiia kz-imei.kz portaly jáne eGov mobile qosymshasy arqyly bekitilgen reglamentke sáikes júrgiziledi. Portal shtattyq rejimde jumys istep tur.
Ótinimderdiń qabyldanbaýy kóbine tehnikalyq aqaýlarǵa emes, mynadai sebepterge bailanysty:
Qurylǵynyń zańdy ákelingenin rastaityn qujattardyń bolmaýy;
Ótinimde derekterdiń qate kórsetilýi (IMEI nómirindegi qatelik, brendti durys kórsetpeý, IMEI sanynyń sáikes kelmeýi jáne basqa da dálsizdikter).
Paidalanýshylarǵa kómek kórsetý úshin tehnikalyq qoldaý qyzmeti, onyń ishinde tegin call-ortalyq jumys isteidi. Azamattar men kásipkerler ótinimdi durys rásimdeý jáne eskertýlerdi túzetý boiynsha keńes ala alady.
Qurylǵylardyń buǵattalýyn jáne qosymsha shyǵyndardy boldyrmaý úshin qandai usynystar bar?
Qurylǵy satyp alar aldynda onyń mártebesin jáne IMEI nómirleriniń durystyǵyn tekserý qajet:
*#06# terip, IMEI nómirin kórý;
Qoraptaǵy IMEI men qurylǵy baptaýlaryndaǵy IMEI-di salystyrý;
Qurylǵynyń verifikatsiia mártebesin eGov Mobile, imei.rfs.gov.kz nemese kz-imei.kz arqyly tekserý.
Eger qurylǵy resmi satýshydan satyp alynsa jáne ol zańdy túrde importtalyp, tiisti rásimderden ótken bolsa, verifikatsiiada qiyndyq týyndamaidy.
Al beiresmi satýshylardan satyp alynǵan qurylǵylar boiynsha táýekeldi satyp alýshy ózi kóteredi. Sondyqtan qaýipsizdik úshin mobildi qurylǵylardy tek resmi saýda núktelerinen satyp alý usynylady.
