Ilon Masktyń SpaceX kompaniiasy aktsiialaryn qor naryǵyna shyǵarýǵa resmi ótinim berdi. Kompaniia IPO arqyly 75 milliard dollar investitsiia tartýdy josparlap otyr. Bul Ýoll-strit tarihyndaǵy eń iri birjalyq ornalastyrýlardyń biri bolýy múmkin, ,dep habarlaidy dalanews.kz.
Málimetterge sáikes, SpaceX aktsiialary biyl maýsym aiynda amerikalyq Nasdaq birjasynda SPCX ataýymen saýdalana bastaýy múmkin. IPO ótkennen keiin de Ilon Mask kompaniianyń basshysy bolyp qala beredi.
SpaceX osyǵan deiin qarjylai kórsetkishterin tolyq jariialap kórmegen. Al endi kompaniia 2025 jylǵy esebin alǵash ret ashyq kórsetti. Byltyr SpaceX-tiń tabysy 18,7 milliard dollarǵa jetken. Biraq jańa tehnologiialar men ǵarysh jobalaryna kóp qarjy salynǵandyqtan, kompaniia 2,6 milliard dollar shyǵynǵa ushyraǵan.
Sonymen qatar SpaceX jaqyn ýaqytta investorlarǵa dividend tólemeitinin málimdedi. Kompaniia barlyq tabysty jańa jobalardy damytýǵa jumsamaq.
Sarapshylardyń baǵalaýynsha, qazir SpaceX-tiń naryqtaǵy jalpy quny 1,25 trillion dollar shamasynda. Al Ilon Masktyń kompaniiadaǵy úlesi 600 milliard dollardan asady.
Eger IPO sátti ótse, Mask álemdegi eń bai adam mártebesin saqtap qana qoimai, tarihtaǵy alǵashqy dollarlyq trillioner atanýy múmkin.
