Amerikalyq kásipker Ilon Mask The Economist basylymyna bergen suhbatynda Resei men Ýkraina arasyndaǵy soǵysty múmkindiginshe tezirek aiaqtap, beibit kelisimge kelýge shaqyrdy, dep habarlaidy dalanews.kz.
Onyń aitýynsha, maidandaǵy jaǵdai sońǵy eki-úsh jylda aitarlyqtai ózgermegenimen, kún saiyn kóptegen adam qaza taýyp jatyr.
«Jaqyn arada qandai da bir beibit kelisimge qol jetkiziledi dep úmittenemin. Óitkeni sońǵy eki-úsh jylda maidan shebi is júzinde ózgergen joq, al aldyńǵy shepte kún saiyn kóptegen adam kóz jumady», – dedi Mask.
Milliarderdiń aitýynsha, ol beibit kelisimdi burynnan qoldap keledi. Onyń pikirinshe, soǵysty toqtatý úshin Reseige belgili bir dárejede ymyra jasaý qajet bolǵan.
«Birneshe jyl buryn bul jerde Reseige belgili bir jeńildikter jasalýy tiis dep jazǵan edim. Bul meniń Reseidiń jaǵynda ekenimdi bildirmeidi. Men tek pragmatikalyq kózqarasty ustandym. Áitpese adamdar jyldar boiy qaza tabady, al sońynda eshteńe ózgermeidi. Dál solai boldy», – dedi ol.
Ilon Masktyń sózinshe, eger taǵy birneshe jyl boiy adamdar maidanda mánsiz qaza taba berse, bul úlken qasiret bolady.
«Maidanda qaza tapqan er adamdardyń balalaryna muny qalai túsindirýge bolady?» – dep surady kásipker.
Sonymen qatar Mask joǵary laýazymdy diplomattardy da synǵa aldy.
«Adamdar maidanda qaza taýyp jatqanda, sándi oryndarda jeti túrli taǵamnan keshki as iship, “Resei ketýi kerek” dep sóz sóileitin joǵary laýazymdy diplomattar meni qatty ashýlandyrady. Biraq olardyń ózderi Reseige barmaidy», – dedi ol.
