Америкалық кәсіпкер Илон Маск The Economist басылымына берген сұхбатында Ресей мен Украина арасындағы соғысты мүмкіндігінше тезірек аяқтап, бейбіт келісімге келуге шақырды, деп хабарлайды dalanews.kz.
Оның айтуынша, майдандағы жағдай соңғы екі-үш жылда айтарлықтай өзгермегенімен, күн сайын көптеген адам қаза тауып жатыр.
«Жақын арада қандай да бір бейбіт келісімге қол жеткізіледі деп үміттенемін. Өйткені соңғы екі-үш жылда майдан шебі іс жүзінде өзгерген жоқ, ал алдыңғы шепте күн сайын көптеген адам көз жұмады», – деді Маск.
Миллиардердің айтуынша, ол бейбіт келісімді бұрыннан қолдап келеді. Оның пікірінше, соғысты тоқтату үшін Ресейге белгілі бір дәрежеде ымыра жасау қажет болған.
«Бірнеше жыл бұрын бұл жерде Ресейге белгілі бір жеңілдіктер жасалуы тиіс деп жазған едім. Бұл менің Ресейдің жағында екенімді білдірмейді. Мен тек прагматикалық көзқарасты ұстандым. Әйтпесе адамдар жылдар бойы қаза табады, ал соңында ештеңе өзгермейді. Дәл солай болды», – деді ол.
Илон Масктың сөзінше, егер тағы бірнеше жыл бойы адамдар майданда мәнсіз қаза таба берсе, бұл үлкен қасірет болады.
«Майданда қаза тапқан ер адамдардың балаларына мұны қалай түсіндіруге болады?» – деп сұрады кәсіпкер.
Сонымен қатар Маск жоғары лауазымды дипломаттарды да сынға алды.
«Адамдар майданда қаза тауып жатқанда, сәнді орындарда жеті түрлі тағамнан кешкі ас ішіп, “Ресей кетуі керек” деп сөз сөйлейтін жоғары лауазымды дипломаттар мені қатты ашуландырады. Бірақ олардың өздері Ресейге бармайды», – деді ол.
