Ishki ister ministrligi internettegi alaiaqtar jasóspirimderdi zańsyz qarjylyq shemalarǵa tartýy múmkin ekenin málimdedi. Kóp jaǵdaida mundai áreketter messendjerler, onlain oiyndar nemese áleýmettik jeliler arqyly bastalady, dep habarlaidy dalanews.kz.
Vedomstvo málimetinshe, beitanys adamdar jastarǵa ońai aqsha tabýdy usynyp, bank kartasyna túsken qarajatty basqa esepshottarǵa aýdarýdy nemese qolma-qol aqshaǵa ainaldyrýdy suraýy múmkin.
Ministrlik mundai áreketterdiń artynda urlanǵan aqshany zańdastyrý shemalary turýy yqtimal ekenin atap ótti. Alaiaqtar óz izin jasyrý úshin úshinshi tulǵalardyń shotyn paidalanady. Sonyń saldarynan mundai iske baiqamai aralasqan adam da jaýapkershilikke tartylýy múmkin.
Osyǵan bailanysty IIM azamattarǵa bank kartasynyń deregi men mobildi bank qosymshalary týraly aqparatty bógde adamdarǵa bermeýge keńes berdi.
