Gúlshara Ábdiqalyqova: «Basshylyq qyzmettegi áielderdiń sany artyp keledi»
Bul týraly "Artyqshylyq ornyna quqyq. Áielder kóshbasshylyǵy qazirgi álemge qalai áser etýi múmkin?" atty dóńgelek ústel otyrysynda Qazaqstan Respýblikasynyń Memlekettik hatshysy Gúlshara Ábdiqalyqova málimdedi.
Aita ketsek, atalǵash is-sharany Qazaqstan Respýblikasy Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń qoldaýymen "EXPO & Women" halyqaralyq uiymy Qazaqstandaǵy "BUU-Áielder" qurylymymen birlesip uiymdastyrdy.
Sondai-aq, jiynǵa memlekettik organdardyń, halyqaralyq uiymdardyń ókilderi, sheteldik jáne ulttyq sarapshylar qatysty.
Otyrystyń shymyldyǵyn túrgen ashqan Gúlshara Ábdiqalyqova óz sózinde álemniń kóptegen damyǵan memleketteri áiel kapitalyn damytý arqyly inkliýzivti ekonomikany qalyptastyrý qajettigin túsingenin tilge tiek etti.
"Elimizdiń memlekettik saiasatynyń negizgi basymdyǵynyń biri – áielder quqyǵyn qamtamasyz etý jáne ilgeriletý, sondai-aq olardyń ekonomikalyq múmkindikterin keńeitý máseleleri bolyp sanalady", – dedi Memlekettik hatshy.
Gúlshara Ábdiqalyqova sonymen birge Nursultan Nazarbaevtyń "Sheshimder qabyldaý deńgeiinde áielder ókildiginiń keńeiýine qol jetkizý qajet" degen sózin atap ótti.
Onyń atap ótkenindei qazirgi tańda Qazaqstannyń qarjy salasynda basshylyq qyzmettegi áielderdiń sany 30 paiyzdan asqan.
Naqtylap aitsaq, názik jandy qaýym 500-den astam shaǵyn jáne orta biznes kompaniialaryn basqarýda, iaǵni olardyń 43 paiyzyn qurap otyr. Osy sektorda qurylǵan barlyq jumys ornynyń úshten biri áielderge tiesili.
Bul oraida Memlekettik hatshy áielder qaýymynyń qoǵamdaǵy áleýeti men rólin arttyrý búkil álemniń ilgerileýimen tikelei bailanysty ekenin atap ótti. Bul maqsatqa qol jetkizý úshin qandai jumystar atqarý qajet?
«Oǵan qol jetkizý úshin BUU usynǵan tórt K baǵytyna negizdelgen jańa mashyqtardy meńgerý qajet», – deidi Gúlshara Ábdiqalyqova.
Olar: syni oilaý, kollaborativtilik, kreativtilik jáne kommýnikativtilik. Álem sarapshylarynyń boljamy boiynsha, 2020 jylǵa qarai búgingi eńbek qyzmetin aiqyndaityn bilim men daǵdylardyń úshten birinen astamy ózgeretin bolady.
Jiyn qorytyndysy boiynsha genderlik meinstrimingti ilgeriletý úshin saiasattaǵy, ekonomikadaǵy jáne qoǵamdaǵy áielder kóshbasshylyǵyn damytýǵa baǵyttalǵan usynymdar ázirlendi.
