بۇل تۋرالى "ارتىقشىلىق ورنىنا قۇقىق. ايەلدەر كوشباسشىلىعى قازىرگى الەمگە قالاي اسەر ەتۋى مۇمكىن؟" اتتى دوڭگەلەك ۇستەل وتىرىسىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا مالىمدەدى.
ايتا كەتسەك، اتالعاش ءىس-شارانى قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن "EXPO & Women" حالىقارالىق ۇيىمى قازاقستانداعى "بۇۇ-ايەلدەر" قۇرىلىمىمەن بىرلەسىپ ۇيىمداستىردى.
سونداي-اق، جيىنعا مەملەكەتتىك ورگانداردىڭ، حالىقارالىق ۇيىمداردىڭ وكىلدەرى، شەتەلدىك جانە ۇلتتىق ساراپشىلار قاتىستى.
وتىرىستىڭ شىمىلدىعىن تۇرگەن اشقان گۇلشارا ءابدىقالىقوۆا ءوز سوزىندە الەمنىڭ كوپتەگەن دامىعان مەملەكەتتەرى ايەل كاپيتالىن دامىتۋ ارقىلى ينكليۋزيۆتى ەكونوميكانى قالىپتاستىرۋ قاجەتتىگىن تۇسىنگەنىن تىلگە تيەك ەتتى.
"ەلىمىزدىڭ مەملەكەتتىك ساياساتىنىڭ نەگىزگى باسىمدىعىنىڭ ءبىرى – ايەلدەر قۇقىعىن قامتاماسىز ەتۋ جانە ىلگەرىلەتۋ، سونداي-اق ولاردىڭ ەكونوميكالىق مۇمكىندىكتەرىن كەڭەيتۋ ماسەلەلەرى بولىپ سانالادى"، – دەدى مەملەكەتتىك حاتشى.
گۇلشارا ءابدىقالىقوۆا سونىمەن بىرگە نۇرسۇلتان نازاربايەۆتىڭ "شەشىمدەر قابىلداۋ دەڭگەيىندە ايەلدەر وكىلدىگىنىڭ كەڭەيۋىنە قول جەتكىزۋ قاجەت" دەگەن ءسوزىن اتاپ ءوتتى.
ونىڭ اتاپ وتكەنىندەي قازىرگى تاڭدا قازاقستاننىڭ قارجى سالاسىندا باسشىلىق قىزمەتتەگى ايەلدەردىڭ سانى 30 پايىزدان اسقان.
ناقتىلاپ ايتساق، نازىك جاندى قاۋىم 500-دەن استام شاعىن جانە ورتا بيزنەس كومپانيالارىن باسقارۋدا، ياعني ولاردىڭ 43 پايىزىن قۇراپ وتىر. وسى سەكتوردا قۇرىلعان بارلىق جۇمىس ورنىنىڭ ۇشتەن ءبىرى ايەلدەرگە تيەسىلى.
بۇل ورايدا مەملەكەتتىك حاتشى ايەلدەر قاۋىمىنىڭ قوعامداعى الەۋەتى مەن ءرولىن ارتتىرۋ بۇكىل الەمنىڭ ىلگەرىلەۋىمەن تىكەلەي بايلانىستى ەكەنىن اتاپ ءوتتى. بۇل ماقساتقا قول جەتكىزۋ ءۇشىن قانداي جۇمىستار اتقارۋ قاجەت؟
«وعان قول جەتكىزۋ ءۇشىن بۇۇ ۇسىنعان ءتورت ك باعىتىنا نەگىزدەلگەن جاڭا ماشىقتاردى مەڭگەرۋ قاجەت»، – دەيدى گۇلشارا ءابدىقالىقوۆا.
ولار: سىني ويلاۋ، كوللابوراتيۆتىلىك، كرەاتيۆتىلىك جانە كوممۋنيكاتيۆتىلىك. الەم ساراپشىلارىنىڭ بولجامى بويىنشا، 2020 جىلعا قاراي بۇگىنگى ەڭبەك قىزمەتىن ايقىندايتىن ءبىلىم مەن داعدىلاردىڭ ۇشتەن بىرىنەن استامى وزگەرەتىن بولادى.
جيىن قورىتىندىسى بويىنشا گەندەرلىك مەينستريمينگتى ىلگەرىلەتۋ ءۇشىن ساياساتتاعى، ەكونوميكاداعى جانە قوعامداعى ايەلدەر كوشباسشىلىعىن دامىتۋعا باعىتتالعان ۇسىنىمدار ازىرلەندى.
