Gúlmira Qanai: «Bilim salasyndaǵy ózgeristerdiń qozǵaýshy – jastar»
– Ǵylym men bilimsiz memleket te, qoǵam da damymaidy. Bul dáleldeýdi qajet etpeitin túsinik. Bilim men ǵylymnyń qarqyndy ózgerý zamanynda elimizdegi jastardyń ǵylymi áleýetin arttyrý – básekege qabiletti elder qataryna aparar basty baspaldaq. Olai bolsa búgingi kezdesýimizdiń basty maqsaty da – memleket pen qoǵam damýyna belsendi qyzmet etetin, jańasha turǵydan oilaityn jas pedagog-ǵalymdardyń jobalary men ideialaryn tyńdaý, týyndaǵan máselerdi birigip sheshý, – dedi Gúlmira Qanai.
Ol óz sózinde Memleket basshysy Qasym-Jomart Toqaev halyqqa arnaǵan Joldaýynda Úkimetke jyl saiyn álemniń jetekshi ǵylymi ortalyqtarynda 500 ǵalymnyń taǵylymdamadan ótýin qamtamasyz etýdi, sondai-aq «Jas ǵalym» jobasy aiasynda zertteý júrgizý úshin 1 myń grant bólýdi tapsyrǵanyn da tilge tiek etti.
– Máselen, «Bolashaq» baǵdarlamasy arqyly biyl 500 stipendiia qazaqstandyq ǵalymdarǵa álemniń jetekshi ǵylymi ortalyqtarynda taǵylymdamadan ótý úshin beriletin bolady. Stipendiia berýge úmitkerlerge akademiialyq oqý úshin 80 mamandyq jáne taǵylymdamadan ótý úshin 137 mamandyq usynylǵan, – dep atap ótti ýniversitet basshysy.
Qazirgi kúnde Qyzdar ýniversitetinde 40 jasqa deiingi 110 jas ǵalym jumys isteidi. Olardyń basym bóligi álemniń jetekshi ýniversitetteri men ǵylymi-zertteý ortalyqtarynda taǵylymdamadan ótip, biliktiligin jetildirgen. Kóptegen jas ǵalymdar ónertabys patentteri men ǵylymi jobalar konkýrsynyń jeńimpazy.
– Ǵylym men bilimdi birge alyp júrý – bul úlken sheberlik. Osyndai ómirlik jolda aianbai eńbek etýlerińiz – ol sizderdiń azamattyq jáne áleýmettik jaýapkershilikterińizdi bildiredi. Bilim salasyndaǵy bolyp jatqan ózgeristerdiń qozǵaýshy kúshi – jas ǵalym-pedagogtar ekeni sózsiz. Sondyqtan zamanǵa sai jańashyl mamandar qajet. Osy jolda Sizderge úlken senim men zor úmit artamyz, – dedi Gúlmira Ámirhanqyzy.
Jiyn barysynda jas ǵalymdar óz usynystary men tilekterin oqý ornynyń basshysyna jetkizip, oilaryn ortaǵa saldy.
Kezdesý sońynda ýniversitet basshysy Gúlmira Qanai aldaǵy ýaqytta da turaqty túrde ózara pikir almasýǵa, jas ǵalymdardy qoldaýdyń birneshe is-sharalaryn birlesip daiarlaýǵa jáne tyń ideialar men utymdy usynystarǵa árdaiym daiyn ekendigin bildirdi.
