Gaz salasynyń jańa rekordy
Óz qyzmetiniń qorytyndysyn shyǵarǵan Ulttyq operator osyndai málimetterdi jariia etti. Málimetterge qaraǵanda, «QazTransGaz» AQ kompaniialar tobynyń ótken 7 aidaǵy shoǵyrlandyrylǵan taza paidasy 83,2 mlrd teńgeni qurady. Bul ótken jylǵy osy ýaqyttaǵy kórsetkishten 39 mlrd teńgege nemese 88% joǵary. Buǵan qosa elimizdegi eń iri salyq tóleýshilerdiń biri memlekettik biýdjetke 38 mlrd. teńge kóleminde salyq tólemderi men ózge aýdarymdar jasady.
Gazdy ótkizý kólemi de aitarlyqtai ósti. Eseptik kezeńdegi satylǵan gaz kólemi 13.7 mlrd. tekshe metrdi qurady. Bul ótken jylǵy osy kezeńmen salystyrǵanda 4 mlrd. tekshe metrge nemese 41% kóp. Eksportqa shyǵarylǵan gaz kólemi 2,9 mlrd tekshe metrge artqan. Onyń ishine Qytaiǵa eksporttalǵan 3,1 mlrd tekshe metr gaz da kiredi.
Ulttyq operator habarlaǵandai, shoǵyrlandyrylǵan taza paida quramyndaǵy magistraldyq tasymaldaý úlesi 40%, eksporttyq operatsiialar 46%, ózge qyzmet túrlerinen túsken tabys 14% qurady.
Aita ketý kerek, sońǵy birneshe jylda Qazaqstannyń gaz tasymaldaý júiesi aitarlyqtai jańartylyp, nátijesinde salanyń tiimdiligi men tabysy áldeqaida artty.
Aita keterligi, QazTransGaz ishki naryqqa jetkiziletin gaz baǵasyn dotatsiialaý arqyly qoljetimdi deńgeide ustap otyr. Osynyń arqasynda tutynýshylar gazdy ózindik qunynan tómen baǵaǵa satyp alady. Bul óz kezeginde kógildir otyndy ishki naryqta satýda úlken shyǵyn ákelip otyr deidi kompaniia ókilderi. Ulttyq operator baǵadaǵy osy aiyrmashylyqty óziniń tabysynan jaýyp, tek birinshi jartyjyldyqta ǵana 27 mlrd. teńgeni dotatsiiaǵa baǵyttapty.
