ءوز قىزمەتىنىڭ قورىتىندىسىن شىعارعان ۇلتتىق وپەراتور وسىنداي مالىمەتتەردى جاريا ەتتى. مالىمەتتەرگە قاراعاندا، «قازترانسگاز» اق كومپانيالار توبىنىڭ وتكەن 7 ايداعى شوعىرلاندىرىلعان تازا پايداسى 83،2 ملرد تەڭگەنى قۇرادى. بۇل وتكەن جىلعى وسى ۋاقىتتاعى كورسەتكىشتەن 39 ملرد تەڭگەگە نەمەسە 88% جوعارى. بۇعان قوسا ەلىمىزدەگى ەڭ ءىرى سالىق تولەۋشىلەردىڭ ءبىرى مەملەكەتتىك بيۋدجەتكە 38 ملرد. تەڭگە كولەمىندە سالىق تولەمدەرى مەن وزگە اۋدارىمدار جاسادى.
گازدى وتكىزۋ كولەمى دە ايتارلىقتاي ءوستى. ەسەپتىك كەزەڭدەگى ساتىلعان گاز كولەمى 13.7 ملرد. تەكشە مەتردى قۇرادى. بۇل وتكەن جىلعى وسى كەزەڭمەن سالىستىرعاندا 4 ملرد. تەكشە مەترگە نەمەسە 41% كوپ. ەكسپورتقا شىعارىلعان گاز كولەمى 2،9 ملرد تەكشە مەترگە ارتقان. ونىڭ ىشىنە قىتايعا ەكسپورتتالعان 3،1 ملرد تەكشە مەتر گاز دا كىرەدى.
ۇلتتىق وپەراتور حابارلاعانداي، شوعىرلاندىرىلعان تازا پايدا قۇرامىنداعى ماگيسترالدىق تاسىمالداۋ ۇلەسى 40%، ەكسپورتتىق وپەراسيالار 46%، وزگە قىزمەت تۇرلەرىنەن تۇسكەن تابىس 14% قۇرادى.
ايتا كەتۋ كەرەك، سوڭعى بىرنەشە جىلدا قازاقستاننىڭ گاز تاسىمالداۋ جۇيەسى ايتارلىقتاي جاڭارتىلىپ، ناتيجەسىندە سالانىڭ تيىمدىلىگى مەن تابىسى الدەقايدا ارتتى.
ايتا كەتەرلىگى، قازترانسگاز ىشكى نارىققا جەتكىزىلەتىن گاز باعاسىن دوتاسيالاۋ ارقىلى قولجەتىمدى دەڭگەيدە ۇستاپ وتىر. وسىنىڭ ارقاسىندا تۇتىنۋشىلار گازدى وزىندىك قۇنىنان تومەن باعاعا ساتىپ الادى. بۇل ءوز كەزەگىندە كوگىلدىر وتىندى ىشكى نارىقتا ساتۋدا ۇلكەن شىعىن اكەلىپ وتىر دەيدى كومپانيا وكىلدەرى. ۇلتتىق وپەراتور باعاداعى وسى ايىرماشىلىقتى ءوزىنىڭ تابىسىنان جاۋىپ، تەك ءبىرىنشى جارتىجىلدىقتا عانا 27 ملرد. تەڭگەنى دوتاسياعا باعىتتاپتى.
