Onyń aitýynsha, konýrs 1 naýryz ben 15 sáýir aralyǵynda ótedi. Oǵan sáýletshi, dizainer, sýretshi, injener, qurylysshy mamandar qatysa alady.
–15 sáýirde halyqaralyq konkýrstyń birinshi qorytyndysyn jariialaimyz. Komissiia 5 jobany iriktep alady. Avtorlarǵa tiisti qarjyny bólip, maket jasatamyz. Al 7 mamyrda astanadaǵy áskeri mýzeide konkýrstyń qorytyndysyn shyǵaramyz, – dedi Arman Shoraev ortalyq kommýnikatsiialar qyzmetinde ótken baspasóz máslihatynda.
Onyń aitýynsha, komissiia músheligine Máýlen Áshimbaev, Abylai hannyń tikelei urpaǵy Shota Ýálihanov, Murat Áýezov, Tursyn Jurtbai, Nurtóre Júsip, Darhan Myńbai, Berik Ábdiǵali, Doshan Joljaqsynov, Tólegen Qajybaev, Murat Mansurov, Ziiabek Kabýldinov kirgen.
Sondai-aq, ol Abylai han monýmentin turǵyzý úshin qansha qarajat keregin aitty. Jobaǵa memleketten qarjy bólinbeidi.
– Meniń oiymsha, jobaǵa 5-7 million dollar kerek. Qarjyny kraýdfanding arqyly jinaýdy kózdep otyrmyz, – dedi Arman Shoraev.
Osy oraida ol monýment Aqmola oblysynda ornalasatynyn jetkizdi.
– Jarty jyl osy monýmenttiń ornyn izdedik. Ulytaý, Semei, Almaty óńirleri usynyldy. Alaida Abylai han ordasyn tikken jer Býrabai men Kókshetaýdyń ortasyndaǵy Kenesary aýylyn tańdap aldyq. Onda biiktigi 90 metr bolatyn jota bar. Monýment osynda bolady. Ǵimarat ǵaryshtan kórinedi dep oilaimyn, – dedi qoǵam belsendisi.
Sonymen qatar, Arman Shoraev Abylai han monýmenti joldyń boiynda ornalasatynyn atap ótti.
– Memleketten 100 gektar jer men jol salyp berýdi surap otyrmyz. Sebebi, onda monýment qana emes, etnoaýyl, qonaqúi bolýy múmkin, – dedi ol.
Baspasóz máslihatynda Shoraev Abylai han monýmentiniń alǵashqy jobasyn kórsetti. Onda Abylai hannyń taqta otyrǵan kelbeti beinelengen. Joba boiynsha hannyń asataiaǵyna jedel saty ornatylady. Osylaisha, keshenge kelýshiler 20 qabat biikke kóterilip, ainalany tamashalai alady. Monýmenttiń biiktigi - 54 metr bolmaq. Alaida qoǵam belsendisi bul jobanyń áli naqty emes ekenin, onyń qorytyndysy konkýrstan keiin belgili bolatynyn jetkizdi.
