Ókiletti keńes tóraǵasy, professor Mýhittin Shimshek májilisti ashyp, qadirmendi qonaqty ýniversitet qabyrǵasynda meiman etý – oqý orny úshin úlken mártebe ekendigin atap ótti. Oqý ordasynda júzege asyp jatqan irgeli jumystardy baiandady.
Ýniversitet rektory Janar Temirbekova jáne rektor ókili Jengiz Tomar sóz sóilep, Fýat Oktaiǵa bilim men ǵylymnyń damýyna qosqan úlesi úshin «Qurmetti professor» akademiialyq ataǵy berilgenin atap ótip, mantiiasyn kigizip, qujatyn tabystady.
Túrkiia Respýblikasynyń vitse-prezidenti Fýat Oktai myrza minberde Qazaqstan Respýblikasyna resmi sapary aiasynda Memleket basshysy Qasym-Jomart Toqaev jáne Premer-Ministr Álihan Smaiylovpen kezdeskenin baiandady.
Ekijaqty kezdesýlerdiń baýyrlas elderdiń yntymaqtastyǵyn jańa deńgeige kóteretinin atap ótti. Ál-Farabi, Júsip Balasaǵun, Qoja Ahmet Iasaýi syndy ǵulamalar murasynyń ózektiligin tilge tiek etip, Abai Qunanbaiulynyń ǵylymǵa úndegen týyndysynan úzindi oqydy.
Kontserttik baǵdarlamadan keiin Fýat Oktai qonaq ýniversitet aýmaǵynyń maketimen tanysyp, «Tóraǵalar alleiasyna» aǵash otyrǵyzdy. Sonymen birge Túrkistan qalasyndaǵy birqatar mádeniet jáne rýhaniiat nysandaryn aralap, Túrkistandaǵy ózgeristerdi joǵary baǵalady.
