2026 jylǵy fýtboldan álem chempionatynyń jartylai finalynda Frantsiia quramasy Ispaniiadan 0:2 esebimen jeńilgennen keiin eldiń birneshe qalasynda jappai tártipsizdik boldy, dep habarlaidy dalanews.kz.
Match aiaqtalysymen Parijde jáne ózge qalalarda jankúierler kóshege shyǵyp, politsiiamen qaqtyǵysty. Saldarynan birneshe avtokólik pen basqa da múlik búlingen.
Frantsiia biligi mundai jaǵdaidyń bolýy múmkin ekenin aldyn ala boljaǵan. Sebebi jartylai final Bastiliiany alý kúnimen tuspa-tus keldi. Osyǵan bailanysty el boiynsha 70 myń politsiia qyzmetkeri men jandarm kezekshilikke jumyldyrylyp, olardyń 5 myńǵa jýyǵy Parijde qyzmet atqarǵan. Sondai-aq tártipsizdiktiń aldyn alý úshin Elisei alańy ýaqytsha jabyldy.
RIA Novosti agenttiginiń málimetinshe, Parij ben oǵan jaqyn mańdaǵy aýdandarda 140-tan astam adam ustaldy. Olardyń basym bóligi politsiiaǵa qarsy pirotehnikalyq zattardy qoldanǵan. Aldyn ala aqparat boiynsha, aýyr jaraqat alǵandar joq.
Tártipsizdik Lion qalasynda da tirkeldi. Match ótip jatqan kezde bir top jas qala ortalyǵyndaǵy Belkýr alańyna jinalyp, keiin politsiiaǵa qarsy otshashýlar men pirotehnikalyq zattardy qoldanǵan. Qazirgi ýaqytta zardap shekkender nemese iri kólemdegi materialdyq shyǵyn týraly aqparat jariialanǵan joq.
