FlyArystan áýe kompaniiasy ishki tekserý barysynda iri kólemde qarajat urlaý faktisin anyqtaǵan. Bul aqparatty Air Astana kompaniiasynyń prezidenti Piter Foster rastady, dep habarlaidy Dalanews.kz.
“FlyArystan-da qarajat urlanǵany anyqtaldy. Bul bilet baǵasyna bailanysty jasalǵan aila-sharǵylar arqyly júzege asqan. Tergeýdi BIG4-ke (tórt iri aýditorlyq kompaniianyń biri) kiretin kompaniia júrgizdi. Biz bul jaǵdaidyń oryn alǵanyn rastaimyz”, – dedi Foster depýtattyń suraǵyna jaýap bere otyryp.
Onyń aitýynsha, Air Astana-nyń enshiles kompaniiasyndaǵy qarajatty urlaý faktileri tiisti organdarǵa tabystalǵan.
Eske salsaq, 4 jeltoqsanda Air Astana áýe kompaniiasynda 1 milliard teńgeden astam qarajat urlanǵany týraly aqparat tarady.
Bul týraly jýrnalist Mihail Kozachkov málim etken edi.
“Air Astana kompaniiasynda 1 mlrd teńgeden astam qarajattyń jymqyrylǵany anyqtaldy. Bul soma sońǵy úsh jyldaǵy aýdit barysynda belgili boldy. Tekserýdi “Ernst & Young” JShS mamandary júrgizgen. Olardyń dereginshe, belgisiz tulǵalar áýe biletterin brondaý aqparattyq júiesine ózgerister engizip, kompaniia múlkin talan-tarajǵa salǵan. Aýditorlyq esepti alǵannan keiin Air Astana basshylyǵy quqyq qorǵaý organdaryna júgindi”, — deidi jýrnalist.
Onyń sózinshe, aviakompaniia ókili Erbolat Súgiirbaev osy iske qatysty aryz jazǵan.
“Atalǵan fakti boiynsha Qylmystyq kodekstiń 189-babynyń 4-bóligi (“asa iri kólemde aqsha jymqyrý”) boiynsha sotqa deiingi tergeý bastaldy”, – dep jazdy Kozachkov Telegram-arnasynda.
Onyń aitýynsha, keltirilgen zalal somasy 1 054 740 000 teńgeni quraidy.
“Bul aýyr qylmys úshin 7 jyldan 12 jylǵa deiin bas bostandyǵynan aiyrý jazasy qarastyrylǵan. Ádette, mundai ister kásiporynnyń laýazymdy tulǵalaryna qatysty tergeledi. Sondyqtan ulttyq áýe tasymaldaýshysynyń keibir top-menedjerleri sot aldynda jaýap berýi múmkin”, – dep tolyqtyrdy Kozachkov.
Al keiinirek, bul urlyqtyń tikelei Air Astana-da emes, onyń “loýkosteri” FlyArystan-da bolǵany belgili boldy. Bul aqparatty bas kompaniianyń ózi rastady.
11 jeltoqsan kúni QazTAG FlyArystan-da 1 milliard teńge urlaý isi Almaty qalasynyń ekonomikalyq tergeý departamentinde qaralyp jatqanyn habarlady.
