FlyArystan اۋە كومپانياسى ىشكى تەكسەرۋ بارىسىندا ءىرى كولەمدە قاراجات ۇرلاۋ فاكتىسىن انىقتاعان. بۇل اقپاراتتى Air Astana كومپانياسىنىڭ پرەزيدەنتى پيتەر فوستەر راستادى، دەپ حابارلايدى Dalanews.kz.

“FlyArystan-دا قاراجات ۇرلانعانى انىقتالدى. بۇل بيلەت باعاسىنا بايلانىستى جاسالعان ايلا-شارعىلار ارقىلى جۇزەگە اسقان. تەرگەۋدى BIG4-كە (ءتورت ءىرى اۋديتورلىق كومپانيانىڭ ءبىرى) كىرەتىن كومپانيا جۇرگىزدى. ءبىز بۇل جاعدايدىڭ ورىن العانىن راستايمىز”، – دەدى فوستەر دەپۋتاتتىڭ سۇراعىنا جاۋاپ بەرە وتىرىپ.

ونىڭ ايتۋىنشا، Air Astana-نىڭ ەنشىلەس كومپانياسىنداعى قاراجاتتى ۇرلاۋ فاكتىلەرى ءتيىستى ورگاندارعا تابىستالعان.

ەسكە سالساق، 4 جەلتوقساندا Air Astana اۋە كومپانياسىندا 1 ميلليارد تەڭگەدەن استام قاراجات ۇرلانعانى تۋرالى اقپارات تارادى.

بۇل تۋرالى جۋرناليست ميحايل كوزاچكوۆ ءمالىم ەتكەن ەدى.

“Air Astana كومپانياسىندا 1 ملرد تەڭگەدەن استام قاراجاتتىڭ جىمقىرىلعانى انىقتالدى. بۇل سوما سوڭعى ءۇش جىلداعى اۋديت بارىسىندا بەلگىلى بولدى. تەكسەرۋدى “Ernst & Young” ج ش س ماماندارى جۇرگىزگەن. ولاردىڭ دەرەگىنشە، بەلگىسىز تۇلعالار اۋە بيلەتتەرىن برونداۋ اقپاراتتىق جۇيەسىنە وزگەرىستەر ەنگىزىپ، كومپانيا مۇلكىن تالان-تاراجعا سالعان. اۋديتورلىق ەسەپتى العاننان كەيىن Air Astana باسشىلىعى قۇقىق قورعاۋ ورگاندارىنا جۇگىندى”، — دەيدى جۋرناليست.

ونىڭ سوزىنشە، اۆياكومپانيا وكىلى ەربولات سۇگىىربايەۆ وسى ىسكە قاتىستى ارىز جازعان.

“اتالعان فاكتى بويىنشا قىلمىستىق كودەكستىڭ 189-بابىنىڭ 4-بولىگى (“اسا ءىرى كولەمدە اقشا جىمقىرۋ”) بويىنشا سوتقا دەيىنگى تەرگەۋ باستالدى”، – دەپ جازدى كوزاچكوۆ Telegram-ارناسىندا.

ونىڭ ايتۋىنشا، كەلتىرىلگەن زالال سوماسى 1 054 740 000 تەڭگەنى قۇرايدى.

“بۇل اۋىر قىلمىس ءۇشىن 7 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان. ادەتتە، مۇنداي ىستەر كاسىپورىننىڭ لاۋازىمدى تۇلعالارىنا قاتىستى تەرگەلەدى. سوندىقتان ۇلتتىق اۋە تاسىمالداۋشىسىنىڭ كەيبىر توپ-مەنەدجەرلەرى سوت الدىندا جاۋاپ بەرۋى مۇمكىن”، – دەپ تولىقتىردى كوزاچكوۆ.

ال كەيىنىرەك، بۇل ۇرلىقتىڭ تىكەلەي Air Astana-دا ەمەس، ونىڭ “لوۋكوستەرى” FlyArystan-دا بولعانى بەلگىلى بولدى. بۇل اقپاراتتى باس كومپانيانىڭ ءوزى راستادى.

11 جەلتوقسان كۇنى قازتاگ FlyArystan-دا 1 ميلليارد تەڭگە ۇرلاۋ ءىسى الماتى قالاسىنىڭ ەكونوميكالىق تەرگەۋ دەپارتامەنتىندە قارالىپ جاتقانىن حابارلادى.