AQSh-tyń Florida shtatynda 1987 jyldan beri ólim jazasynyń oryndalýyn kútip kelgen 74 jastaǵy Dennis Sochorǵa ólim jazasy oryndaldy, dep habarlaidy dalanews.kz.
Fox News málimetinshe, Dennis Sochor Florida tarihynda ólim jazasy oryndalǵan eń qart sottalýshy atandy.
Tergeý deregine sáikes, ol 1982 jylǵy 1 qańtarda 18 jastaǵy Patrisiia Giffordpen barda tanysqan. Keiin qyz Dennis Sochor jáne onyń aǵasymen birge tańǵy as ishýge ketken. Biraz ýaqyttan soń Sochor qyzdy ońasha jerge aparyp, jynystyq qatynasqa túsýdi usynǵan. Qyz bas tartqannan keiin ony tunshyqtyryp óltirip, máiitinen qutylǵan. Patrisiia Giffordtyń denesi áli kúnge deiin tabylǵan joq.
Sochor 1986 jyly basqa qylmystyq is boiynsha ustalyp, keiin Floridaǵa ekstraditsiialanǵan. Sol jerde ol kisi óltirgenin moiyndaǵan.
1987 jyly alqabiler ony adam urlaý jáne aldyn ala josparlanǵan kisi óltirý baptary boiynsha kináli dep tanyp, ólim jazasyna kesken.
Ólim jazasy Florida shtatyndaǵy túrmede úsh túrli preparattan turatyn ólim inektsiiasy arqyly oryndaldy.
Jaza oryndalar aldynda Dennis Sochor zembilge tańylyp, oǵan dárilik eritindi engizetin júie ornatylǵan. Ol qaitys bolar aldynda Patrisiia Giffordtyń otbasynan birneshe ret keshirim surap, jasaǵan qylmysyna «qatty ókinetinin» aitqan. Sondai-aq sońǵy asynan bas tartyp, ólim jazasy aldynda bir kelýshimen jáne rýhani tálimgerimen kezdesken.
Bul – Florida shtatynda 2026 jyldyń basynan beri oryndalǵan onynshy ólim jazasy. Al 2025 jyly shtatta rekordtyq kórsetkish tirkelip, 19 adamǵa ólim jazasy oryndalǵan. Bul – AQSh-taǵy kez kelgen shtat arasyndaǵy eń joǵary kórsetkish. Jalpy, 2025 jyly AQSh boiynsha 47 adam ólim jazasyna kesilgen.
