Fitch Ratings halyqaralyq reıtıńtik agenttigi Halyk Bank-tiń shetel jáne ulttyq valútadaǵy uzaq merzimdi reıtıńin "Turaqty" boljammen "BBB-" deńgeıinde bekitti. Osylaısha Qazaqstandaǵy eń iri banktiń biri ekonomıkalyq qıyn-qystaý sátke qaramastan saladaǵy berik pozısıasyn saqtap otyr, dep jazady Dalanews.kz.

Fitch Ratings-tiń baǵalaýy boıynsha, Qazaqstannyń bank sektoryndaǵy Halyk Bank-tiń joǵary naryqtyq úlesi, tabystylyqtyń turaqty joǵary kórsetkishteri, eleýli kapıtaldandyrý jáne ornyqty ótimdilik reıtıńti qoldaıtyn negizgi faktorlar bolyp tabylady. Agenttiktiń túsiniktemesi boıynsha, "Turaqty" boljam Halyk Bank-tiń kredıttik kórsetkishteri orta merzimdi perspektıvada kúshti bolyp qala beretinin aıqyndap tur.

Fitch Ratings Halyk Bank-tiń korporatıvtik jáne bólshek bıznestegi kúshti naryqtyq pozısıalary jáne teńdestirilgen kredıttik portfeli bar senimdi bıznes-modelin, sondaı-aq Bank aktıvteriniń sapasy sońǵy bes jylda aıtarlyqtaı jaqsarǵanyn atap ótti. Sonymen qatar Agenttik turaqty marjanyń, joǵary operasıalyq tıimdiliktiń jáne táýekeldiń tómen qunynyń arqasynda 2025-2026 jyldary Banktiń joǵary tabystylyǵynyń saqtalýyn kútedi. 

"Fitch Ratings agenttiginiń bergen kredıttik reıtıńi ózgermeli ekonomıkalyq orta men syrttan tóngen syndar jaǵdaıynda Banktiń tıimdi jumysyn, al bergen baǵasy Halyk-tyń Qazaqstannyń bank naryǵyndaǵy jetekshi oıynshy retindegi qarjylyq turaqtylyǵy men senimdiligin kórsetedi. Sondaı-aq bul naryqtyń Halyk-qa kórsetken senimi men senimdiliginiń dáleli", delingen atalǵan banktiń habarlamasynda.

Aıta ketsek, Halyk Bank - Qazaqstandaǵy eń iri kredıtor. 2025 jylǵy 30 maýsymdaǵy jaǵdaı boıynsha, onyń aktıvi 19,616 mlrd teńgeni quraıdy.  Bank eldegi eń iri klıenttik bazalardyń birine ıe jáne fılıal jelisi keńinen taraǵan: 542 fılıaly men bólimshesi bar, sonymen qatar Grýzıa men Ózbekstanda da qyzmet kórsetedi.

Halyk aksıalary Almaty, London jáne Astana qor bırjalarynda saýdalanady.