Agrarlyq nesie korporatsiiasy "Keń dala 2" baǵdarlamasyn biyl bir ai buryn, 1 qazanda iske qosady. Atalǵan baǵdarlama aiasynda agrosektordaǵylarǵa jyldyq syiaqy mólsherlemesi 5%-ben jeńildetilgen nesie usynylady, dep habarlaidy Dalanews.kz.
Memleket basshysy Qasym-Jomart Toqaev buǵan deiin Úkimet pen qarjy institýttarynyń aldyna kóktemgi egis jumystaryn ýaqtyly júrgizý jóninde naqty mindet qoiǵan bolatyn. Bul rette qajetti qarajatty fermerlerge jetkizýdi tapsyryp, "kóktemgi egis jumystaryn ýaqtyly júrgizý óte mańyzdy" ekeni aitylady. Osy strategiialyq tapsyrmany oryndaý úshin jáne qoldaý sharalaryn jetildirý jónindegi júieli jumysty júrgizý aiasynda "Agrarlyq nesie korporatsiiasy" erte qimyldap, 2025 jyldyń 1 qazanynan bastap "Keń dala 2" baǵdarlamasy boiynsha ótinimder qabyldaý bastalatyny týraly habarlaidy. Osy sheshimniń nátijesinde baǵdarlama byltyrǵydan bir ai buryn iske qosylady. Iaǵni, aýyl sharýashylyǵy taýaryn óndirýshilerdiń egin egýdiń jańa maýsymyna erte qamdanýlaryna óte qolaily ári ikemdi bolmaq.
Baǵdarlamanyń jeńildigi – jyldyq syiaqy mólsherlemesi 5% deńgeiinde saqtalady. Kepildikpen qamtamasyz etý jetispeýshiligi máselesin sheshý úshin pármendi mehanizm kózdelgen: qajet bolǵan jaǵdaida qaryz somasynyń 85%-na deiin "Damý" kásipkerlikti damytý qorynyń kepildigin paidalanýǵa bolady.
Eger 2022 jyly "Keń dala" baǵdarlamasyna 140 mlrd teńge baǵyttalsa, 2024 jyly bul soma 321,5 mlrd teńgege jetti, al 2025 jyly 500 mlrd teńgeden asty. Bul dinamika agrarlyq sektordy júieli qoldaý sharalarynyń keńeiip kele jatqanyn kórsetedi. Agroónerkásip úshin negizgi basymdyq – qarjylandyrý mehanizmderin yńǵaily, túsinikti jáne agrarlyq sektordyń ózekti suranystaryna jaýap bere alatyndai etip jetildirý bolyp qala beredi.
"Keń dala 2" baǵdarlamasyna qatysýǵa ótinim berý úshin fermerler Agrarlyq nesie korporatsiiasynyń óńirlerdegi filialdaryna júgine alady.
"Agrosektordaǵy nesielik resýrstarǵa suranys turaqty túrde joǵary bolyp qala beredi jáne bizdiń mindetimiz — ony qanaǵattandyrý ǵana emes, naryqqa ýaqtyly ári ikemdi quraldardy usyný. Biz erte qarjylandyrýdyń suranysqa ie ekenin kórip otyrmyz, bul fermerlerdiń júieli jáne tiimdi jumys isteýlerine múmkindik beredi. Sondyqtan biz aýyl sharýashylyǵy taýaryn óndirýshilerdiń naqty qajettilikterine súiene otyryp, óz ónimderimizdi beiimdeýdi jalǵastyramyz", - dep atap ótti "Agrarlyq nesie korporatsiiasy" AQ Basqarma tóraǵasy Almat Áshirbekov.
Tolyq aqparat Agrocredit.kz saitynda bar. Sondai-aq 5353 (Kcell, Activ, Beeline) jáne +7 775 007 68 07 (Tele2, Altel) Call-ortalyq nómirleri boiynsha habarlasyp, keńes alýǵa bolady.
