Almatyda jańa oqý jylyna daiyndyq jumystary aiaqtalýǵa jaqyn. 1 qyrkúiekte megapoliste segiz jańa mektep pen qoldanystaǵy birneshe bilim berý uiymyna qosymsha ǵimarattar paidalanýǵa beriledi. Sonyń arqasynda qalada 12 myńǵa jýyq jańa oqýshy orny ashylyp, mektepterdegi oryn tapshylyǵyn azaitýǵa múmkindik týady, dep habarlaidy dalanews.kz.
Almaty qalalyq Bilim basqarmasy Túrksib aýdanyndaǵy jańa №228 jáne №229 mektepterdiń daiyndyǵymen tanystyrdy.
Biyl paidalanýǵa beriletin segiz mekteptiń jalpy syiymdylyǵy 11 050 oryndy quraidy. Onyń ishinde Túrksib aýdanynda tórt jańa mektep ashylady. Solardyń biri – «Taim Siti» turǵyn úi kesheni mańynda ornalasqan №228 jaily mektebi.
Zamanaýi mektep, jańa múmkindikter
Ulttyq «Keleshek mektepteri» jobasy aiasynda salynǵan №228 mektep 2000 oqýshyǵa arnalǵan. Jalpy aýmaǵy 24 myń sharshy metrden asatyn úsh qabatty bilim ordasy zamanaýi talaptarǵa tolyq sai jabdyqtalǵan.
Mektepte bastaýysh, orta jáne joǵary synyptarǵa arnalǵan 96 oqý kabineti bar. Onyń ishinde informatika jáne tsifrlyq saýattylyq kabinetteri, himiia men biotehnologiia, fizika jáne nanotehnologiia, biologiia zerthanalary, STEM zerthanasy men robototehnika kabineti qarastyrylǵan.
Sondai-aq oqýshylarǵa arnalǵan jeke lokerler ornatylyp, demalys aimaqtary jasaqtalǵan. Mektepte inkliýziia kabineti, sensorlyq bólme, horeografiia zaly jumys isteidi.
Jańa mekteptiń basty erekshelikteriniń biri – qaýipsizdik júiesiniń kúsheitilýi. Bilim berý uiymy beinebaqylaý júiesimen jáne Face ID arqyly kirý baqylaýymen jabdyqtalǵan. Ǵimarat 10 baldan joǵary seismikalyq belsendilikke tótep beretin talaptarǵa sai salynǵan.
Sport pen shyǵarmashylyqqa jaǵdai jasalǵan
Mektep aýmaǵynda fýtbol alańy, ámbebap sport alańdary jáne tennis korttary ornalasqan.
Tórt sport zalynyń ekeýi bastaýysh, ekeýi joǵary synyp oqýshylaryna arnalǵan. Sonymen qatar 330 oryndyq akt zaly jáne 440 oryndyq ashana qarastyrylǵan.
Oqýshylardyń shyǵarmashylyq jáne turmystyq daǵdylaryn damytýǵa arnalǵan arnaiy sheberhanalar da jumys isteidi. «Tamaqtaný mádenieti», «Úi mádenieti», «Dizain jáne tehnologiia» kabinetterinde balalar durys tamaqtaný, turmystyq mádeniet, tigin jáne dizain negizderin meńgeredi.
Jańa mektepter qai aýdandarda ashylady?
Jańa oqý jylynda Alataý aýdanynda úsh mektep, Túrksib aýdanynda tórt mektep, Jetisý aýdanynda bir mektep paidalanýǵa beriledi.
Atap aitqanda:
- №230 mektep – 2000 oryn;
- №231 mektep – 1200 oryn;
- №178 mektep – 550 oryn;
- №226 mektep – 600 oryn;
- №227 mektep – 1500 oryn;
- №228 mektep – 2000 oryn;
- №229 mektep – 2000 oryn;
- №225 mektep – 1200 oryn.
Budan bólek, №112 jáne №16 mektepterge árqaisysy 300 oryndyq qosymsha ǵimarattar salynǵan.
Jalpy alǵanda, memlekettik qoldaý aiasynda Almatyda sońǵy jyldary 34 800 oryndyq 21 «Keleshek mektebi» paidalanýǵa berilgen.
Birinshi synypqa 31 myńnan astam bala qabyldandy
Jańa oqý jylynda Almaty mektepterinde shamamen 356 myń oqýshy bilim alady. Bul ótken jylmen salystyrǵanda shamamen 3 paiyzǵa kóp.
26 tamyzdaǵy jaǵdai boiynsha birinshi synypqa 31 602 bala qabyldanǵan. Onyń ishinde 28 843 oqýshy memlekettik, 2759 oqýshy jekemenshik mektepterge barady.
Áleýmettik qoldaý sharalary aiasynda «Mektepke jol» aktsiiasy boiynsha 7669 balaǵa mektep formasy men oqý quraldaryn satyp alý úshin 460 million teńge bólingen. Sonymen qatar jańa oqý jylynda 133 myń bala tegin ystyq tamaqpen qamtylady.
11 myńnan astam oqýshy mektep avtobýsymen qatynaidy
Baspasóz týry barysynda jýrnalisterge «Mektep avtobýsy» jobasy da tanystyryldy.
Joba aiasynda qaladaǵy 60 mekteptiń 11 myńnan astam oqýshysy tasymaldaýmen qamtylady. Ol úshin 250 arnaiy avtobýs qyzmet kórsetedi. Bul ásirese qalanyń shalǵai aýdandarynda turatyn balalar úshin mańyzdy.
Ákimdik turǵyndarǵa úndeý jasady
Almaty qalasynyń ákimdigi jańa oqý jylynyń bastalýyna bailanysty qala kóshelerinde kólik júktemesi aitarlyqtai artýy múmkin ekenin eskertti.
Qala qyzmetteri jol qozǵalysyn retteý jáne keptelisti azaitý úshin qajetti sharalardy qabyldap jatqanyn atap ótken ákimdik turǵyndardy qyrkúiektiń alǵashqy kúnderi múmkindiginshe qoǵamdyq kólikti paidalanýǵa shaqyrdy.
Mamandardyń aitýynsha, bul qala joldaryndaǵy, ásirese mektepterdiń mańyndaǵy kólik qozǵalysyn jeńildetip, balalardyń qaýipsizdigin qamtamasyz etýge kómektesedi.
Osylaisha Almaty jańa oqý jylyn jańa mekteptermen, qosymsha oqýshy oryndarymen, jańartylǵan infraqurylymmen jáne qaýipsiz bilim berý ortasymen qarsy almaq.
