Almaty qalasynda kóliktegi qozǵalys qaýipsizdigi men salany tsifrlandyrýǵa arnalǵan VI Eýraziialyq forým bastaldy. Aýqymdy sharaǵa jol qozǵalysy salasynyń halyqaralyq sarapshylary, tasymaldaýshy mekemeler men ulttyq kompaniialar, memlekettik organdar men otandyq mamandar qatysyp otyr, dep habarlaidy Dalanews.kz
Forým barysynda qozǵalys qaýipsizdigin arttyrý, intellektýaldy kólik júielerin engizý, tsifrlyq sheshimder arqyly apattyq jaǵdailardyń aldyn alý máseleleri talqylandy. Sonymen qatar, jol infraqurylymynyń sapasyn baqylaýda jańa tehnologiialardy qoldanýdyń tiimdiligi atap ótildi.
Jol aktivteri sapasynyń ulttyq ortalyǵynyń Bas direktory Bolatbek Aitbaev óz baiandamasynda saladaǵy negizgi basymdyqtarǵa toqtaldy.
«Qozǵalys qaýipsizdigin qamtamasyz etý úshin eń aldymen jol sapasy joǵary deńgeide bolýy qajet. Biz qazir jańa tehnologiialardy engizý arqyly joldyń jaǵdaiyn jedel baǵalap, derekterdi tsifrlyq júiede jinaqtaýǵa mán berip otyrmyz. Bul – apattyń aldyn alý men qaýipsizdikti arttyrýǵa múmkindik beretin mańyzdy qadam», – dedi ol.
Shara aiasynda mamandar zamanaýi innovatsiialyq sheshimdermen tájiribe almasyp, kóliktegi tsifrlandyrý úderisteriniń aimaqtyq damý baǵytyn aiqyndap jatyr.
