Kásipker Talǵat Akýov "Eýrazıalyq bank" aksıonerlik qoǵamynyń top-menedjeri Konstantın Skorobogatovty "Tas bulaq" demalys ornyn reıderlik jolmen tartyp alýǵa qatysy bar dep aıyptady, dep habarlaıdy Dalanews.kz.
“2014 jyly Skorobogatov "Eýrazıalyq banktiń" fırmalyq blankisinde ózin bank dırektory dep kórsetip, qol qoıǵan. Bul – qujattardy qoldan jasaýdyń aıqyn dáleli! Shyn máninde, Skorobogatov eshqashan "Eýrazıalyq banktiń" dırektory bolmaǵan. Meniń ótinishime sáıkes, Qaraǵandy qalasyndaǵy tergeýshi bul másele boıynsha Skorobogatovty suraqqa alǵan. Alaıda ol ózine dırektor laýazymy taǵaıyndalǵany týraly buıryqty, jalaqysy men zeınetaqy qorynan úzindi kóshirmelerdi usyna almaǵan. Bul onyń jalǵan qujattar jasap, ózin dırektor retinde kórsetip, jalǵan hattar taratqanyn dáleldeıdi”, – dedi Akýov "KazTAG" redaksıasyna bergen málimdemesinde.
Akýovtyń aıtýynsha, Skorobogatov "Eýrazıalyq banktiń" dırektory retinde jalǵan hattar daıyndap, olardy Qaraǵandy oblysy ákimdigine, júzdegen týrısik uıymdarǵa jáne "Atameken" kásipkerler palatasyna jibergen. Bul áreketter zańsyz dep tanylyp, qylmystyq jaýapkershilikke jatady.
Atalǵan máselege qatysty "Eýrazıalyq banktiń" baspasóz qyzmeti túsinikteme berdi.
“Skorobogatov "Eýrazıalyq bankte" atqarýshy dırektor qyzmetin atqaryp keledi. Talǵat Jaýdovıch Akýovtyń bizge jáne Skorobogatovqa qatysty "reıderlik áreketter" jaıly aıyptaýlary 2017 jyldan beri ártúrli ınstansıaǵa turaqty túrde joldanyp keledi. Osy ýaqyt aralyǵynda onyń aryzdary boıynsha quqyq qorǵaý organdary, azamattyq sottar jáne Qazaqstan Respýblıkasynyń Joǵarǵy soty máselelerdi jan-jaqty qarastyrdy. Nátıjesinde, aryzdarda keltirilgen birde-bir derek rastalmady”, – dep habarlady "KazTAG" agenttigine bank ókilderi.
Sonymen qatar qarjy mekemesi sottardyń Akýovqa qatysty qaryzdardy óndirip alý jáne múlikti tárkileý týraly sheshimderin zańdy ári negizdi dep tanylǵanyn atap ótti. Al Akýovtyń shaǵymdary qanaǵattandyrylmaǵan.
“Akýovtyń kóptegen shaǵymy boıynsha qozǵalǵan qylmystyq isterdiń nátıjesinde banktiń qyzmetkerleri nemese basqa tulǵalar tarapynan qandaı da bir zań buzýshylyqtar anyqtalǵan joq. Sondyqtan "Eýrazıalyq bank" Akýovtyń ózine jáne Skorobogatovqa qatysty aıyptaýlaryn jalǵan dep esepteıdi”, – delingen banktiń málimdemesinde.
