Almaty oblysynan bastaý alǵan aksıa aıasynda ǵalymdardan, túrli etnos jastarynan quralǵan ekspedısıa músheleri elimizdegi tarıhı-mádenı eskertkishtermen tanysyp, kıeli oryndarda tazalyq jumystaryn júrgizýde.
Búgin aksıa estafetasyn Jambyl oblysynyń jastary Túrkistan oblysyna tabystady. Shymkenttegi «Qazaqstan halqy Assambleıasy» ǵımaratynda ótken sharaǵa Jambyl oblysynyń delegasıasy, Túrkistan oblystyq «Qoǵamdyq kelisim» KMM qyzmetkerleri, etnomádenı birlestikterdiń ókilderi, «Jańǵyrý joly» respýblıkalyq jastar qozǵalysy óńirlik shtabynyń músheleri qatysty.
Jıyndy Túrkistan oblystyq «Qoǵamdyq kelisim» KMM basshysy Erbol Baıqonaqov ashyp, jobanyń mańyzyna toqtaldy.
«Rýhanı jańǵyrý» baǵdarlamasy aıasynda ótip jatqan is-shara Qazaqstannyń baı mádenı murasymen jastardyń tereń tanysýyna múmkindik beredi. Sol arqyly jas urpaqtyń týǵan jerge degen súıispenshiligin arttyryp, qazaqstandyq biregeılikti, eldiń birligin nyǵaıtý kózdelýde. Aksıa barysynda uıymdastyrylatyn eko-senbilikter qasıetti nysandardy kútip, qasterleýdiń mańyzdylyǵyn artyrady,- deıdi Erbol Súleımenuly.
Jıynnan keıin ekspedısıa músheleri óńirimizdegi tarıhı-mádenı oryndarǵa jol tartty. Olar búgin «Otyrar tóbe» qalashyǵyna, Otyrar memlekettik arheologıalyq qoryq-murajaıyna, «Arystanbab» kesenesine, Túrkistandaǵy oblystyq tarıhı-mádenı etnografıalyq ortalyǵyna, «Áziret Sultan» memlekettik qoryq-murajaıyna baryp, tarıhı qundylyqtarymen tanysady.
Aıta ketý kerek, «Uly Dala Eliniń kıeli murasy» respýblıkalyq tarıhı-ekologıalyq aksıasy úsh kezeńnen turady. Birinshi kezeń 5-9 mamyr aralyǵynda Jeńis kúnine oraı «Qamqor» ataýymen ótti. Ekinshi kezeńde, ıaǵnı 28-37 mamyr aralyǵynda «Taǵzym» aksıasy aıasynda saıası qýǵyn-súrgin qurbandary eske alyndy.
Elimizdiń barlyq aımaǵynda ótip jatqan aksıa 15-18 tamyz kúnderi «Jańǵyrý joly» respýblıkalyq jastar qozǵalysy músheleriniń qatysýymen Almaty oblysynda qorytyndylanady.
