2025 jyldyń birinshi jarty jyldyǵynda Almatyda 220 eski turǵyn úi iesi jańa jaily páterge kóshti. Qonys aýdarý jumystaryn Almaty qalasy ákimdiginiń «Almaty» ÁKK enshiles uiymy «Qalalyq kúrdeli qurylys kásiporny» JShS jáne investorlar «Almaty qalasynyń turǵyn úidi jańartý baǵdarlamasy - 2030» aiasynda júzege asyryp otyr,- dep habarlaidy Dalanews.kz
Almatylyqtar jańa baspanany «bólme ornyna bólme» qaǵidaty boiynsha nemese burynǵy turǵyn úiiniń naryqtyq qunyna sáikes ótemaqy alý arqyly ielendi. Jańartý baǵdarlamasy aiasynda barlyq páter taza árleýmen beriledi. Onda internet júrgizilip, órtke qarsy dabyl júiesi, santehnika, faians, gaz nemese elektr plitasy ornatylǵan.
Atalǵan kezeńde eń kóp turǵyn Túrksib aýdanynda – 99 adam, Almaly aýdanynda – 57, Jetisý aýdanynda – 32, Áýezov aýdanynda – 20, Bostandyq aýdanynda – 7, Alataý aýdanynda – 3 jáne Medeý aýdanynda – 2 adam jańa páterge qonystandy.
Baǵdarlamaǵa sáikes, kóshirý jáne ǵimarattardy súrý jumystary barlyq menshik ieleriniń kelisimimen ǵana júrgiziledi. Erekshe kútimdi qajet etetin adamdar úshin birinshi qabattaǵy nemese jedelsaty, pandýs jáne kedergisiz qoljetimdiligi bar úilerden páter qarastyrylǵan. Qala turǵyndarynyń qaýipsizdigin qamtamasyz etý maqsatynda ásirese karkas-qamysty úiler men tektonikalyq jaryq aimaǵynda ornalasqan ǵimarattardy súrýge erekshe kóńil bólinedi.
Berilgen baspanaǵa kóshýden bas tartqan jaǵdaida turǵyndar eski úide tura beredi, biraq yqtimal qaýip-qaterge ózi jaýapty bolady.
Biyl jyl sońyna deiin «Qalalyq kúrdeli qurylys kásiporny» men investorlardyń kúshimen taǵy 600-den astam adamdy jańa turǵyn úimen qamtamasyz etý josparlanyp otyr.
«Jańartý baǵdarlamasy keshendi tásilge negizdelgen. Turǵyn úi ǵana emes, sonymen birge qala turǵyndarynyń ómir salty ózgeredi: jaily orta qalyptasyp, jańa qoǵamdyq keńistikter, jumys oryndary men qyzmetter paida bolady. Sonymen qatar, Almatynyń sáýlettik kelbeti jańarady. 2030 jylǵa deiin qaladaǵy eski úilerdiń sanyn 1 366-dan 690-ǵa deiin azaityp, shamamen 7 500 menshik iesin zamanaýi páterge kóshirý josparlanyp otyr», — dedi «Qalalyq kúrdeli qurylys kásiporny» JShS basqarma tóraǵasy Rinat Qurmanov.
«Almatynyń turǵyn úidi jańartý baǵdarlamasy – 2030» qalalyq ákimdik tarapynan ázirlenip, 2024 jyldyń qarasha aiynda máslihat bekitken. Baǵdarlamanyń ákimshisi «Almaty» ÁKK» AQ, al ýákiletti uiym Almaty qalasy ákimdiginiń «Qalalyq kúrdeli qurylys kásiporny» JShS.
