Eski Qazaqstannyń ókilderi Bergeı Rysqalıev pen Aslan Mýsın Londonda kózge tústi, - dep habarlaıdy Dalanews.kz.
Atyraý oblysyn jáne Atyraý qalasyn basqarǵan Rysqalıev saıası sebeptermen Ulybrıtanıada bosqyn mártebesin alǵan bolatyn. Sebebi eldiń Joǵarǵy soty qylmystyq qýdalaýdyń saıası astary bar dep sheshken.
Rysqalıev pen Mýsınniń Londonda júrgen sýreti qoǵam belsendisi Turarbek Qusaıynovtyń paraqshasynda paıda boldy.
"Shyndyǵynda Atyraý jurtyna keń tanymal Bergeı aǵamyzdyń aınalasyndaǵy jigitter Evropadaǵy qazaq dıasporasynyń ishindegi eń myqty top desek bolady. Bul aǵalarymyzdy sýdan taza, sútten aq demeımin,sebebi Qazaqstan sekildi sýper prezıdenttik júıede jemqorlyqtan eshkim ada bola almaıdy.Biraq qalaı aıtsaq ta, ár qazaq- meniń jalǵyzym demekshi, elden jyraq júrgen kez kelgen evropashyl qazaq biz úshin qymbat bolýy tıis...", - deıdi qoǵam belsendisi.
2012 jyly 15 tamyzda eks prezıdent Nursultan Nazarbaev sol kezdegi ákim Bergeı Rysqalıevti Atyraý oblysy basshylyǵynan alyp, ornyna Baqtyqoja İzmuhambetti saılaýǵa barǵan. Nazarbaev oblysty alty jylǵa jýyq basqarǵan Rysqalıev basqa qyzmetke aýysatynyn aıtqan bolatyn.
Al kelesi kún, ıaǵnı 16 tamyzda BAQ-tar Bergeı Rysqalıev densaýlyq jaǵdaıyna baılanysty otstavkaǵa ketkenin habarlaı bastady. Otstavkadan keıin Rysqalıevti dıskredıtasıalaý kampanıasy bastalyp, onyń qolastynda bolǵandardy ustap, qysym kórsetý bastalǵan.
2013 jyldyń 5 aqpanynda Rysqalıevke izdeý salyndy. Oǵan Qylmystyq kodekstiń 176-babynda kózdelgen qylmysty jasady degen jáne uıymdasqan qylmystyq qoǵamdastyq qurdy degen aıyp taǵyldy. 2019 jyldyń 25 qańtarynda syrttaı sot otyrysy ótip, sot Bergeı Rysqalıevti 17 jylǵa bas bostandyǵynan aıyrdy. AQSH saıasatkerleri Rysqalıevti syrttaı sottaýdyń saıası astary bar dep baǵa berdi.
Eske salaıyq, buǵan deıin "Eski Qazaqstannyń" ókili Asqar Mamın Túrkıa jerinde kózge túsip qalǵan bolatyn. Qazir ol Ystambulda demalyp, Istıklál kóshesi men Taksım alańynda kóbirek qydyratyn bolǵan. Bosforǵa qarap, keshki ýaqytyn oılanýmen ótkizedi.
"Jańa Qazaqstan" tarapynan ázirge Asqar Mamınge suraq joq. Sondyqtan ol shetelge emin-erkin shyǵa alady. Al onymen kezinde qyzmettes bolǵan kóptegen sheneýikterge Qazaqstan aýmaǵyn tastaýǵa beıresmı tıym salynǵan. Iaǵnı, shekaradan ótkizbeıdi" - deıdi Dala Inside.
Keıinnen Eski Qazaqstannyń jarqyn ókilderi laýazymdy qyzmetke kele bastaǵany belgili boldy. Sonyń ishinde bılikten uzaq jyl kete almaı júrgen Shyǵys Qazaqstan oblysynyń eks-ákimi Danıal Ahmetov pen burynǵy Úkimet basshysy Asqar Mamın sport salasyndaǵy laýazymdy qyzmetterge usynyla bastady.
