ەسكى قازاقستاننىڭ وكىلدەرى بەرگەي رىسقالييەۆ پەن اسلان مۋسين لوندوندا كوزگە ءتۇستى، - دەپ حابارلايدى Dalanews.kz.
اتىراۋ وبلىسىن جانە اتىراۋ قالاسىن باسقارعان رىسقالييەۆ ساياسي سەبەپتەرمەن ۇلىبريتانيادا بوسقىن مارتەبەسىن العان بولاتىن. سەبەبى ەلدىڭ جوعارعى سوتى قىلمىستىق قۋدالاۋدىڭ ساياسي استارى بار دەپ شەشكەن.
رىسقالييەۆ پەن ءمۋسيننىڭ لوندوندا جۇرگەن سۋرەتى قوعام بەلسەندىسى تۇراربەك قۇسايىنوۆتىڭ پاراقشاسىندا پايدا بولدى.
"شىندىعىندا اتىراۋ جۇرتىنا كەڭ تانىمال بەرگەي اعامىزدىڭ اينالاسىنداعى جىگىتتەر ەۆروپاداعى قازاق دياسپوراسىنىڭ ىشىندەگى ەڭ مىقتى توپ دەسەك بولادى. بۇل اعالارىمىزدى سۋدان تازا، سۇتتەن اق دەمەيمىن،سەبەبى قازاقستان سەكىلدى سۋپەر پرەزيدەنتتىك جۇيەدە جەمقورلىقتان ەشكىم ادا بولا المايدى.ءبىراق قالاي ايتساق تا، ءار قازاق- مەنىڭ جالعىزىم دەمەكشى، ەلدەن جىراق جۇرگەن كەز كەلگەن ەۆروپاشىل قازاق ءبىز ءۇشىن قىمبات بولۋى ءتيىس..."، - دەيدى قوعام بەلسەندىسى.
2012 جىلى 15 تامىزدا ەكس پرەزيدەنت نۇرسۇلتان نازاربايەۆ سول كەزدەگى اكىم بەرگەي رىسقالييەۆتى اتىراۋ وبلىسى باسشىلىعىنان الىپ، ورنىنا باقتىقوجا ىزمۇحامبەتتى سايلاۋعا بارعان. نازاربايەۆ وبلىستى التى جىلعا جۋىق باسقارعان رىسقالييەۆ باسقا قىزمەتكە اۋىساتىنىن ايتقان بولاتىن.
ال كەلەسى كۇن، ياعني 16 تامىزدا باق-تار بەرگەي رىسقالييەۆ دەنساۋلىق جاعدايىنا بايلانىستى وتستاۆكاعا كەتكەنىن حابارلاي باستادى. وتستاۆكادان كەيىن رىسقالييەۆتى ديسكرەديتاسيالاۋ كامپانياسى باستالىپ، ونىڭ قولاستىندا بولعانداردى ۇستاپ، قىسىم كورسەتۋ باستالعان.
2013 جىلدىڭ 5 اقپانىندا رىسقالييەۆكە ىزدەۋ سالىندى. وعان قىلمىستىق كودەكستىڭ 176-بابىندا كوزدەلگەن قىلمىستى جاسادى دەگەن جانە ۇيىمداسقان قىلمىستىق قوعامداستىق قۇردى دەگەن ايىپ تاعىلدى. 2019 جىلدىڭ 25 قاڭتارىندا سىرتتاي سوت وتىرىسى ءوتىپ، سوت بەرگەي رىسقالييەۆتى 17 جىلعا باس بوستاندىعىنان ايىردى. اقش ساياساتكەرلەرى رىسقالييەۆتى سىرتتاي سوتتاۋدىڭ ساياسي استارى بار دەپ باعا بەردى.
ەسكە سالايىق، بۇعان دەيىن "ەسكى قازاقستاننىڭ" وكىلى اسقار مامين تۇركيا جەرىندە كوزگە ءتۇسىپ قالعان بولاتىن. ءقازىر ول ىستامبۇلدا دەمالىپ، يستيكلال كوشەسى مەن تاكسيم الاڭىندا كوبىرەك قىدىراتىن بولعان. بوسفورعا قاراپ، كەشكى ۋاقىتىن ويلانۋمەن وتكىزەدى.
"جاڭا قازاقستان" تاراپىنان ازىرگە اسقار مامينگە سۇراق جوق. سوندىقتان ول شەتەلگە ەمىن-ەركىن شىعا الادى. ال ونىمەن كەزىندە قىزمەتتەس بولعان كوپتەگەن شەنەۋىكتەرگە قازاقستان اۋماعىن تاستاۋعا بەيرەسمي تيىم سالىنعان. ياعني، شەكارادان وتكىزبەيدى" - دەيدى Dala Inside.
كەيىننەن ەسكى قازاقستاننىڭ جارقىن وكىلدەرى لاۋازىمدى قىزمەتكە كەلە باستاعانى بەلگىلى بولدى. سونىڭ ىشىندە بيلىكتەن ۇزاق جىل كەتە الماي جۇرگەن شىعىس قازاقستان وبلىسىنىڭ ەكس-اكىمى دانيال احمەتوۆ پەن بۇرىنعى ۇكىمەت باسشىسى اسقار مامين سپورت سالاسىنداعى لاۋازىمدى قىزمەتتەرگە ۇسىنىلا باستادى.
