Jańa Qazaqstan qurý týraly bastama kóterilgenine alty jylǵa jýyq ýaqyt ótti. Osy aralyqta qoǵamda ne ózgerdi? Eldiń saiasi keńistiginde ilgerileý baiqala ma? Bul saýaldarǵa májilis depýtaty Aidos Sarym jaýap berip, qazirgi jaǵdaidy ashyq talqylapty, dep jazady Dalanews.kz.
Depýtattyń paiymynsha, Qazaqstanda bilik aýysqannan beri qoǵamda túrli pikirler qalyptasty. Halyqtyń bir bóligi «bári jaman» degen ustanymda bolsa, kelesi bir toby «bári jaqsy» degenge senedi. Mundai jaǵdai Nazarbaev tusynda da bolǵan, biraq ol kezde maqtaý sózder qattyraq, al syndar báseńdeý estiletin. Qazir, kerisinshe, syn ashyq aitylyp, maqtaýlar báseńdegen. Biraq bul eki kózqaras ta bir adamnyń sanasynda erkin úilesip, qatar ómir súre beredi.
Sarym sońǵy jyldary qoǵamda «Nazarbaevtyń kezinde jaqsy edi» degen saǵynysh seziminiń kúsheiip kele jatqanyn moiyndaidy.
«Qazir áleýmettik jelide Elbasynyń «Men ketken soń áli ókinesińder» degen sózi jii tarap júr. Shyn máninde, bul nostalgiia – qalypty jaǵdai. Aldaǵy sailaýlarda sol «Eski Qazaqstandy» ańsaityn kúshter qaitadan boi kórsetýi ábden múmkin», – deidi depýtat.
Sarymnyń pikirinshe, Qazaqstanda qazir jańa saiasi mádeniet pen jańa erejeler qalyptasyp jatyr. Ásirese, keiingi ýaqytta bilikke kelgen adamdar naqty máselelerdi mitingpen emes, júieli jumys arqyly sheshýge bolatynyn túsine bastaǵan.
«Kóp adam bilikke kelmei turyp, emotsiiamen sóilep, bilikti synǵa alyp jatady. Al parlamentke kelgen soń aqparattyń shynaiy kólemin, memlekettiń múmkindikterin kórip, kózqarasy ózgerip jatady. Qazir parlament osyndai alańǵa ainaldy. Bul – jańa mádeniettiń belgisi», – deidi ol.
Aidos Sarym qazir bilik oppozitsiiany múlde joqqa shyǵarmaitynyn, kerisinshe, naqty ustanymy bar kúshtermen jumys isteýge múddeli ekenin atap ótti.
«Buryn Prezident ákimshiligi búkil saiasi alańdy ózi basqaryp, bárin baqylaýda ustaýǵa tyryssa, qazir jaǵdai kúrdelengen. Memleket sheshim qabyldaǵanda burynǵyǵa qaraǵanda kóp taraptyń pikirin eskeredi, saiasi protsester kúrdelendi», – deidi depýtat.
Suqbat barysynda depýtat korrýptsiia máselesine de toqtalyp, qazirgi memlekettik qyzmetkerler úshin jaǵdai qiyndai túskenin aitty.
«Qazir memlekettik qyzmetker bolý burynǵydai jaily jumys emes. Ashyqtyq artty, baqylaý kúsheidi, sybailas jemqorlyqqa qarsy sharalar kúsheitildi. Jemqorlyq buryn da boldy, qazir de bar, biraq erejelerdiń ózgergenin bári túsine bastady. Sondyqtan qazir bilikke ashkózdikpen kelý qaýipti ekenin sezetinder kóbeidi», – deidi Aidos Sarym.
Jýrnalistiń «Jańa Qazaqstan» degen bastamadan jurt úlken nátije kútip, kóńili qaldy emes pe?» degen suraǵyna depýtat bylai jaýap bergen:
«Shyn máninde, qoǵamda buryn-sońdy bolmaǵan tereń ózgerister bolyp jatyr. Biraq bári birden bilinbeidi. Aldaǵy birneshe jylda osy ózgerister turaqty institýttarǵa ainalyp, nátije beredi dep oilaimyn. Eń bastysy – adam ómiriniń quny artyp, qoǵamnyń úni bilikke jetetin boldy. Bul jetistikti qazir bilikti synaýshylardyń ózi moiyndap júr».
Sarym bolashaqta Qazaqstannyń saiasi alańynda jańa kúshter paida bolatynyna senimdi. Onyń pikirinshe, qoǵamda jańa ideialar men naqty ideologiiasy bar partiialar qalyptasýy tiis.
«Saiasatty aiqai-shý men miting arqyly emes, naqty josparmen, júieli jumyspen jasaý kerek. Eski lozýngtarmen qoǵamdy ózgerte almaimyz», – dep sózin túiindedi depýtat.
Eskertý: Aidos Sarymnyń shapalaq.kz saityna bergen suqbaty negizinde ázirlendi.
