Bul týraly Áset Mataev álemjelidegi paraqshasynda jazdy.
Jazbada alty ai buryn Joǵarǵy Sottyń Qazaqstan jýrnalister odaǵynyń jetekshileri Áset pen Seitqazy Mataevtardan zańsyz sottalǵany úshin memleket atynan keshirim suraǵany jáne mundai jait táýelsiz Qazaqstan tarihynda alǵash ret oryn alǵany aitylǵan.
"Qaiǵyly qańtar oqiǵasynyń keiin jarty jyl ótken soń meniń ómirim kútpegen jerden basqa arnaǵa buryldy.
Buǵan deiin birneshe dúrkin tabandy túrde talap etsek te, taýymyzdy shaǵyp, sharasyz kúige túsirgen Joǵarǵy Sot ákem Seiitqazy Mataev ekeýimizdi aqtap shyǵardy.
Bir kezderi saiasi sebeptermen bastalǵan qylmystyq is Bas Prokýratýra qyzmetkerleriniń muqiiat tekserisinen keiin joiyldy jáne qazir Joǵarǵy Sottyń biýlleteninde zańsyz sottaýdyń mysaly retinde jariialanyp jatyr. Men úshin Ádiletti Qazaqstan – adam quqyǵy men zań ústemdigi bárinen biik turatyn ádiletti memleket, ádiletti qoǵam. Iaǵni, barlyq adamnyń quqyǵy zańmen qorǵalyp, qylmys aiaýsyz jazalanýy tiis", - dep jazdy Áset Mataev.
Sonymen qatar ol óziniń atyna memlekettik organdardyń zańsyz is-áreketterine qatysty halyqtan kóp shaǵym túsetinin jáne sol ótinish-shaǵymdardyń barlyǵyn jan-jaqty tekserý qajet ekenin atap ótti.
"Meni sońǵy kezderi ózimniń qalamdas áriptesterime, iaǵni tilshilerge qatysty sóz bostandyǵyn shektep, ádildikti belden basý oqiǵalarynyń kóbeiip ketkeni qatty alańdatady. Óitkeni, mundai taýqymetti bizdiń otbasymyz da talai márte basynan keshirgen. Sóz bostandyǵy jolynda basymyzdy báigege tigip, biraz ómirimizdi tárk ettik. Densaýlyǵymyzǵa da qandai nuqsan kelgeni aitpasa da túsinikti. Sońǵy jyldary biz meniń áriptesterime, jýrnalisterge jáne qoǵam belsendilerine jasalǵan qatigez soqqylarǵa kýá boldyq", - delingen habarlamada.
Áset Mataevtyń sózinshe, adamdar oǵan óńirler men ortalyq memlekettik organdardaǵy kadrlyq sheshimderge qatysty suraqtardy, kommýnaldyq saladaǵy problemalar men sybailas jemqorlyqqa qatysty suraqtardy jii qoiady eken.
Úkimet pen parlamentke jańa kózqarastaǵy belsendi adamdar qajet. Memlekettik apparat biýrokratiia men qaǵazbastylyqqa kómilip qaldy. Shuǵyl sheshimder qabyldaý bylai tursyn, moinyna jaýapkershilik alýdan qashatyn boldy.
"Bizde ekologiia, jumyssyzdyq jáne qaýipsizdikke qatysty problemalar tolyp tur. Kóptegen júielik problemalar paida boldy. Áreket etetin kez keldi. Kez kelgen máseleniń sońǵy sheshimin tabýdy prezidenttiń moinyna ilip qoiý durys emes dep sanaimyn. Sheneýnikter qoǵamnyń ózimen qoian-qoltyq aralasa júrip, halyqtyń talabyn birlesip sheshý jolynda alǵa basýy qajet...
Barlyǵy ózgeris pen damýdy qalaidy. Bireý ony shetelden izdeidi, biraq men óz ómirimdi Otanymmen bailanystyramyn. Bizdiń býyn kóptegen máselelerdi sheshe alady jáne Qazaqstandy damý men zańdylyq jolyna baǵyttai alady!"- dep qorytyndylady Áset Mataev.
Atap ótilgendei, Á. Mataevty jastar ókilderi, qoǵam qairatkerleri, óner adamdary, ártúrli óńirlerde BAQ salasynda jumys isteitin áriptesteri qoldaidy.
Осы тұста:
Eks-depýtat Jańbyrshin sailaýǵa qatysty mańyzdy málimdeme jasady. Tolyǵyraq osy jerde: t.me/dalainside/1113
https://dalanews.kz/del-qazir/86089-bolat-nazarbaevtyng-almaty-bazarlary
https://dalanews.kz/sadak/86081-qazaqstan-reseydegi-sauda-okildigin
