Memlekettik keńesshi Erlan Qarin áleýmettik jelidegi paraqshasynda onomastikalyq máselelerdi retteý jumystarynyń bastalǵanyn habarlady, dep jazady Dalanews.kz.
Erlan Qarinniń aitýynsha, onomastika salasy qazirgi ýaqytta ortalyqtandyrylyp jatyr.
"Óńirlerge jaýapkershilikti óz deńgeiinde bergen durys bolǵanymen, keibir ideologiialyq máselelerde júielilik qajet. Keibir aimaqtarda bul saladaǵy jumystardy retteý kerek", - dedi ol.
Sondai-aq, Memlekettik keńesshi jaqynda júrgizilgen zertteý nátijelerimen bólisip, 1991 jylǵa deiin jáne odan keiingi jyldary elde ornatylǵan eskertkishterdiń sanyn anyqtaǵanyn aitty.
1991 jylǵa deiin 70 jyl boiy sovet úkimeti kezeńinde 331 eskertkish ornatylsa, táýelsizdik jyldarynda 1200-den astam eskertkish qoiylǵan eken.
"Biz 30 jylda keńes biliginiń 70 jylda atqarmaǵan jumysyn úsh ese atqaryp shyqtyq. Keńes biligi kezinde eskertkish ornatýǵa qumar bolǵanyn mensiz de jaqsy bilesizder. Aýyl-aýylda ornatty. Al biz úsh ese artyq eskertkish salǵanbyz. Ara-qatynas qandai? Kóp jerde belgili bir belsendi azamattardyń yǵyna jyǵylady da, qalaǵan adamdaryna ornata beredi.
Olardyń paidasyna sheshkennen keiin basqa azamattar "bizdiń atalarymyz eskerýsiz qaldy" dep shyǵady. Sodan keiin árine, ary qarai toqtaýsyz kete beredi.
Munyń shegi bolmaidy. Óitkeni bárin qamtý múmkin emes. Bir jerde bes metrlik eskertkish boi kóterse, ekinshi jerde 8 metr qylyp jarysady. Eskertkishterdiń biiktigimen jarysar bolsaq, jetken jerimiz osy!? Biz ne maqsatty kózdep otyrmyz? Babalardyń ósietin keiingi urpaqqa úlgi etý úshin be, álde maqtan etý úshin be?" - deidi ol.
Onyń aitýynsha, qazirgi tańda eskertkishterdi ornatý máseleleri ideologiialyq, mazmundyq jáne estetikalyq turǵydan qatań qaralyp, rettelýde.
