مەملەكەتتىك كەڭەسشى ەرلان قارين الەۋمەتتىك جەلىدەگى پاراقشاسىندا ونوماستيكالىق ماسەلەلەردى رەتتەۋ جۇمىستارىنىڭ باستالعانىن حابارلادى، دەپ جازادى Dalanews.kz.

ەرلان ءقاريننىڭ ايتۋىنشا، ونوماستيكا سالاسى قازىرگى ۋاقىتتا ورتالىقتاندىرىلىپ جاتىر.

"وڭىرلەرگە جاۋاپكەرشىلىكتى ءوز دەڭگەيىندە بەرگەن دۇرىس بولعانىمەن، كەيبىر يدەولوگيالىق ماسەلەلەردە جۇيەلىلىك قاجەت. كەيبىر ايماقتاردا بۇل سالاداعى جۇمىستاردى رەتتەۋ كەرەك"، - دەدى ول.

سونداي-اق، مەملەكەتتىك كەڭەسشى جاقىندا جۇرگىزىلگەن زەرتتەۋ ناتيجەلەرىمەن ءبولىسىپ، 1991 جىلعا دەيىن جانە ودان كەيىنگى جىلدارى ەلدە ورناتىلعان ەسكەرتكىشتەردىڭ سانىن انىقتاعانىن ايتتى.

1991 جىلعا دەيىن 70 جىل بويى سوۆەت ۇكىمەتى كەزەڭىندە 331 ەسكەرتكىش ورناتىلسا، تاۋەلسىزدىك جىلدارىندا 1200-دەن استام ەسكەرتكىش قويىلعان ەكەن.

"ءبىز 30 جىلدا كەڭەس بيلىگىنىڭ 70 جىلدا اتقارماعان جۇمىسىن ءۇش ەسە اتقارىپ شىقتىق. كەڭەس بيلىگى كەزىندە ەسكەرتكىش ورناتۋعا قۇمار بولعانىن مەنسىز دە جاقسى بىلەسىزدەر. اۋىل-اۋىلدا ورناتتى. ال ءبىز ءۇش ەسە ارتىق ەسكەرتكىش سالعانبىز. ارا-قاتىناس قانداي؟ كوپ جەردە بەلگىلى ءبىر بەلسەندى ازاماتتاردىڭ ىعىنا جىعىلادى دا، قالاعان ادامدارىنا ورناتا بەرەدى.

ولاردىڭ پايداسىنا شەشكەننەن كەيىن باسقا ازاماتتار "ءبىزدىڭ اتالارىمىز ەسكەرۋسىز قالدى" دەپ شىعادى. سودان كەيىن ارينە، ارى قاراي توقتاۋسىز كەتە بەرەدى.

مۇنىڭ شەگى بولمايدى. ويتكەنى ءبارىن قامتۋ مۇمكىن ەمەس. ءبىر جەردە بەس مەترلىك ەسكەرتكىش بوي كوتەرسە، ەكىنشى جەردە 8 مەتر قىلىپ جارىسادى. ەسكەرتكىشتەردىڭ بيىكتىگىمەن جارىسار بولساق، جەتكەن جەرىمىز وسى!؟ ءبىز نە ماقساتتى كوزدەپ وتىرمىز؟ بابالاردىڭ وسيەتىن كەيىنگى ۇرپاققا ۇلگى ەتۋ ءۇشىن بە، الدە ماقتان ەتۋ ءۇشىن بە؟" - دەيدى ول.

ونىڭ ايتۋىنشا، قازىرگى تاڭدا ەسكەرتكىشتەردى ورناتۋ ماسەلەلەرى يدەولوگيالىق، مازمۇندىق جانە ەستەتيكالىق تۇرعىدان قاتاڭ قارالىپ، رەتتەلۋدە.